កសិដ្ឋានមួយកន្លែងនៅជាយក្រុង Chicago ដែលជាវាលចំការពោតដ៏ធំបំផុតរបស់ពិភពលោក កំពុងប្រារព្ធខួបលើកទី60 នៃភ្នាក់ងារចារកម្មសម្ងាត់ដ៏ល្បីល្បាញបំផុតរបស់ពិភពលោកគឺ James Bond ។
បណ្ដាញសារព័ត៌មាន REUTERS រាយការណ៍ពីទីក្រុង Chicago រដ្ឋ Illinois សហរដ្ឋអាម៉េរិក ក្នុងថ្ងៃនេះថា សួនវង្វេងដ៏ស្មុគស្មាញមួយ មានផ្លូវដើរប្រវែងជាង 16គីឡូម៉ែត្រ និងស្ថិតនៅលើផ្ទៃដី 28ហិចតា ក្នុងភូមិ Spring Grove ភាគខាងជើងនៃទីក្រុង Chicago កំពុងប្រារព្ធខួបលើកទី60 នៃភ្នាក់ងារចារកម្មសម្ងាត់ដ៏ល្បីល្បាញបំផុតរបស់ពិភពលោក James Bond ។
លោក George Richardson សហកម្មសិទ្ធិកសិដ្ឋាន Richardson Adventure Farm បាននិយាយថា នៅក្នុងឆ្នាំនេះ កសិដ្ឋានបានជ្រើសរើសប្រធានបទដ៏រីករាយមួយ ដោយពួកគេបានរំលេចខួប James Bond ក្នុងន័យបញ្ហាញដល់ខួបលើកទី60 របស់គាត់ ។
លោក Richardson បានបន្ថែមថា សួនវង្វេងនេះត្រូវបានសាងសង់ ដោយប្រើប្រាស់ត្រាក់ទ័រកសិកម្មទំនើបៗ ដែលត្រូវបានបំពាក់ដោយប្រព័ន្ធ GPS ប្រព័ន្ធគូសវាស និងប្រព័ន្ធកាប់ឆ្ការចំការពោតពិសេសៗ ដើម្បីធ្វើការងារនេះ ។ កសិដ្ឋានចំការពោតនេះត្រូវបានគេដាំដើម្បីបង្កើតជាវាលស្មៅ សម្រាប់រចនាជារូបផ្សេងៗដែលពួកគេបានជ្រើសរើស ។
