អនុប្រធានាធិបតីអាម៉េរិកលោកស្រី កាម៉ាឡា ហារីស (Kamala Harris) បានប្រកាសក្នុងដំណើរទស្សនកិច្ចរបស់លោកស្រីទៅកាន់ប្រទេសថៃកាលពីថ្ងៃសៅរ៍ថា សហរដ្ឋអាម៉េរិកនឹងជួយប្រទេសថៃក្នុងការអភិវឌ្ឍថាមពលនុយក្លេអ៊ែរតាមរយៈម៉ាស៊ីនរ៉េអាក់ទ័រតូចៗប្រភេទថ្មី ដែលជាផ្នែកនៃកម្មវិធីដែលមានគោលបំណងប្រយុទ្ធប្រឆាំងនឹងការប្រែប្រួលអាកាសធាតុ ។
សេតវិមានបាននិយាយថាជំនួយនេះគឺជាផ្នែកមួយនៃគំនិតផ្តួចផ្តើម Net Zero World Initiative របស់ខ្លួនដែលជាគម្រោងដែលបានចាប់ផ្តើមនៅក្នុងកិច្ចប្រជុំកំពូលអាកាសធាតុនៅទីក្រុង Glasgow កាលពីឆ្នាំមុន ដែលសហរដ្ឋអាម៉េរិកបានចាប់ដៃគូជាមួយវិស័យឯកជន និងសប្បុរសជនដើម្បីលើកកម្ពស់ថាមពលស្អាត ។
ប្រទេសថៃមិនមានរោងចក្រថាមពលនុយក្លេអ៊ែរទេ ដោយក្ដីបារម្ភថរបស់សាធារណៈជនចំពោះបញ្ហានេះបានហក់ឡើងបន្ទាប់ពីគ្រោះមហន្តរាយហ្វូគូស៊ីម៉ាឆ្នាំ ២០១១ នៅប្រទេសជប៉ុន ។
សេតវិមានបាននិយាយថា ខ្លួននឹងផ្តល់ជំនួយបច្ចេកទេសដល់ប្រទេសអាស៊ីអាគ្នេយ៍មួយនេះ ដើម្បីដាក់ពង្រាយបច្ចេកវិទ្យាដែលកំពុងអភិវឌ្ឍនៃម៉ាស៊ីនរ៉េអាក់ទ័រម៉ូឌុលតូចៗ ដែលផលិតដោយរោងចក្រ និងចល័ត ។ រ៉េអាក់ទ័របែបនេះ ជាទូទៅត្រូវបានចាត់ទុកថាមានសុវត្ថិភាពជាង ដោយសារពួកគេមិនត្រូវការអន្តរាគមន៍ពីមនុស្សដើម្បីបិទនៅពេលមានអាសន្ន ។
ប្រភព ៖ South China Morning Post