កាសែតរុស្ស៊ី Kommersant បានរាយការណ៍ថា វិមានក្រឹមឡាំងបានប្រាប់មន្ត្រីដែលពាក់ព័ន្ធក្នុងការរៀបចំសម្រាប់ការបោះឆ្នោតប្រធានាធិបតីរុស្ស៊ីឆ្នាំ ២០២៤ ឱ្យឈប់ប្រើប្រាស់ទូរសព្ទ iPhones របស់ Apple ដោយសារតែមានការព្រួយបារម្ភថាឧបករណ៍ទាំងនោះងាយរងគ្រោះទៅនឹងភ្នាក់ងារចារកម្មលោកខាងលិច ។
នៅក្នុងសិក្ខាសាលាដែលរៀបចំឡើងដោយវិមានក្រឹមឡាំងសម្រាប់មន្ត្រីពាក់ព័ន្ធនឹងនយោបាយក្នុងស្រុក លោក Sergei Kiriyenko អនុប្រធានទីមួយនៃរដ្ឋបាលប្រធានាធិបតីបានប្រាប់មន្ត្រីឱ្យផ្លាស់ប្តូរទូរស័ព្ទរបស់ពួកគេត្រឹមថ្ងៃទី ១ ខែមេសា នេះបើតាមកាសែត Kommersant បាននិយាយដោយដកស្រង់ប្រភពមិនស្គាល់អត្តសញ្ញាណ ។
នៅពេលសួរអំពីបញ្ហានេះកាលពីថ្ងៃចន្ទ អ្នកនាំពាក្យវិមានក្រឹមឡាំង លោក Dmitry Peskov បាននិយាយថា លោកមិនអាចបញ្ជាក់របាយការណ៍នេះបានទេ។
Apple មិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ។
កាសែត Kommersant បាននិយាយបន្តថា វិមានក្រឹមឡាំងអាចផ្តល់ទូរសព្ទផ្សេងទៀតជាមួយនឹងប្រព័ន្ធប្រតិបត្តិការផ្សេងគ្នាដើម្បីជំនួសទូរស័ព្ទ iPhones ។
ប្រភព ៖ Reuters
By Suon Visal
