ប្រធានាធិបតីអ៊ុយក្រែន វ៉ូឡូឌីមៀរ ហ្សេលេនស្គី កាលពីថ្ងៃអាទិត្យបានកត់សម្គាល់ពីវឌ្ឍនភាពក្នុងការវាយលុករបស់អ៊ុយក្រែនដែលបានចាប់ផ្តើមកាលពីសប្តាហ៍មុន ដោយអរគុណកងកម្លាំងរបស់គាត់សម្រាប់ការរំដោះបានមកវិញនូវទីតាំងចំនួនពីរនៅភាគខាងត្បូង មួយទីតាំងទៀតនៅភាគខាងកើត នេះបើយោងតាមការចេញផ្សាយដោយសារព័ត៌មាន Reuters ។
គាត់មិនបានបញ្ជាក់ឲ្យច្បាស់ថាទឹកដីនៅឯណាទេ ហើយក៏មិនបានផ្តល់ពេលវេលាដែរ តែគាត់បាននិយាយថាគាត់បានទទួលដំណឹងល្អ ពីមេបញ្ជាការយោធា និងជាប្រធានផ្នែកចារកម្មរបស់គាត់ ។
នៅក្នុងវីដេអូសន្ទរកថាពេលយប់របស់គាត់លោក ហ្សេលេនស្គី បានថ្លែងអំណរគុណដល់កងកម្លាំងរបស់គាត់សម្រាប់ការរំដោះទីតាំងក្នុងតំបន់ Donetsk ភាគខាងកើត និងការចាប់យកតំបន់ភាគខាងកើតក្នុងទិសដៅ Lysychansk-Siversk និងការរំដោះទីតាំងនៅភាគខាងត្បូងចំនួនពីរ ។
លោក Kyrylo Tymoshenko អនុប្រធានការិយាល័យប្រធានាធិបតី កាលពីថ្ងៃអាទិត្យមុននេះ បានបង្ហោះរូបភាពទាហានលើកទង់ជាតិអ៊ុយក្រែន លើភូមិមួយ ដែលគាត់និយាយថា ស្ថិតនៅក្នុងតំបន់ភាគខាងត្បូង ដែលជាចំណុចសំខាន់ នៃការវាយលុករបស់អ៊ុយក្រែន ។
