កាលពីម្សិលមិញ (ថ្ងៃទី06 ខែកញ្ញា) លោក Liz Truss នាយករដ្ឋមន្ត្រីថ្មីនៃចក្រភពអង់គ្លេសបានសន្យាថា នឹងពន្លឿនការដោះស្រាយវិបត្តិថាមពលនៅក្នុងសុន្ទរកថាដំបូង ក្នុងនាមជាមេដឹកនាំប្រទេស គាត់មានទំនុកចិត្តថា រដ្ឋាភិបាលថ្មីនឹងដឹកនាំចក្រភពអង់គ្លេសជំនះបញ្ហាប្រឈមនានាឱ្យបាន ។ នេះបើយោងតាមការចេញផ្សាយដោយសារព័ត៌មាន CNBC ។
លោកស្រីបាននិយាយថា រដ្ឋាភិបាលថ្មីនឹងដោះស្រាយបញ្ហានៃការកើនឡើងយ៉ាងខ្លាំងនូវតម្លៃថាមពល ដែលមូលហេតុចម្បងគឺ មកពីឥទ្ធិពលនៃសង្គ្រាមរវាងរុស្ស៊ី-អ៊ុយក្រែន ថែមទាំងនឹងធានាឱ្យបាននូវឃ្លាំងស្តុកប្រេងឥន្ធនៈ ដើម្បីទប់ស្កាត់កង្វះខាតថាមពល រួមទាំងការកែទម្រង់ប្រព័ន្ធសុខភាពសាធារណៈ និងបែងចែកថវិកាជាង100ពាន់លានផោន ដើម្បីកាត់បន្ថយវិបត្តិក្នុងជីវភាពរស់នៅដែលកំពុងកើតឡើងក្នុងប្រទេសនាពេលនេះផងដែរ ។
លោកស្រី Liz Truss បានបញ្ជាក់ថា “ខ្ញុំនឹងធ្វើការដោះស្រាយវិបត្តិថាមពលដែលបណ្តាលមកពីសង្គ្រាមដែលលោក វ្ល៉ាឌីមៀរ ពូទីន បង្កឡើងនៅក្នុងសប្តាហ៍នេះ យើងនឹងធ្វើការគ្រប់គ្រងលើការចំណាយលើប្រភពថាមពល និងធានាឱ្យបាននូវឃ្លាំងស្តុកប្រេងឥន្ធនៈ ដើម្បីបំពេញ និងគាំទ្ររាល់ការចំណាយផ្សេងៗនៅពេលអនាគតខាងមុខនេះ” ។ លោកស្រីបានបន្តថា “ខ្ញុំមានទំនុកចិត្តថា យើងនឹងអាចជម្នះរាល់បញ្ហាបាន យើងអាចស្តារសេដ្ឋកិច្ចឡើងវិញ ហើយយើងរួមគ្នាបង្កើតចក្រភពអង់គ្លេសដ៏ស្រស់ស្អាតដ៏ទំនើបមួយនេះ” ។
