រុស្ស៊ីឃុំខ្លួនអ្នកកាសែតអាម៉េរិកម្នាក់ដែលធ្វើការឲ្យកាសែត Wall Street Journal ពីបទចារកម្ម

ទីភ្នាក់ងារសន្តិសុខកំពូលរបស់រុស្ស៊ីបាននិយាយថា អាជ្ញាធររុស្ស៊ីបានឃុំខ្លួនអ្នកយកព័ត៌មានជនជាតិអាម៉េរិកម្នាក់ដែលធ្វើការឲ្យកាសែត Wall Street Journal ពីបទចារកម្ម។

សេវាសន្តិសុខសហព័ន្ធរុស្ស៊ី (FSB) បាននិយាយនៅថ្ងៃព្រហស្បតិ៍នេះថា លោក Evan Gershkovich ត្រូវបានចាប់ខ្លួននៅទីក្រុង Ural Mountains ខណៈដែលអ្នកកាសែតរូបនេះត្រូវបានចោទប្រកាន់ថាកំពុងព្យាយាមទទួលបានព័ត៌មានទាក់ទងនឹងសន្ដិសុខជាតិរុស្ស៊ី ។

សេវាកម្មសន្តិសុខសហព័ន្ធរុស្ស៊ីបានចោទប្រកាន់ថា លោក Gershkovich កំពុងប្រមូលព័ត៌មានទាក់ទងនឹងសន្ដិសុខជាតិរុស្ស៊ីអំពីសកម្មភាពរបស់សហគ្រាសមួយក្នុងចំណោមសហគ្រាសឧស្សាហកម្មយោធារុស្ស៊ីដែលបង្កើតជាសម្ងាត់រដ្ឋ ។

យោងតាមប្រព័ន្ធផ្សព្វផ្សាយក្នុងស្រុក គាត់កំពុងគ្របដណ្តប់ព័ត៌មានទាក់ទងនឹងសង្គ្រាមនៅអ៊ុយក្រែន និងក្រុមទាហានស៊ីឈ្នួល Wagner ។

FSB មិនបានបញ្ជាក់ថាការចាប់ខ្លួននេះកើតឡើងនៅពេលណានោះទេ ។ លោក Gershkovich អាចប្រឈមមុខនឹងការជាប់ពន្ធនាគាររហូតដល់ 20 ឆ្នាំ ប្រសិនបើត្រូវបានផ្តន្ទាទោសពីបទចារកម្ម។

គាត់គឺជាអ្នករាយការណ៍ដំបូងគេសម្រាប់សារព័ត៌មានអាម៉េរិកដែលត្រូវបានចាប់ខ្លួនពីបទចារកម្មនៅក្នុងប្រទេសរុស្ស៊ីចាប់តាំងពីសង្គ្រាមត្រជាក់ ហើយការចាប់ខ្លួនរបស់គាត់បានកើតឡើងចំពេលមានភាពតានតឹងជាសកលជុំវិញការប្រយុទ្ធគ្នាក្នុងប្រទេសអ៊ុយក្រែន ។ លោក Gershkovich ដែលត្រូវបានគេទទួលស្គាល់យ៉ាងច្បាស់ថាជាអ្នកកាសែតនិយាយអំពីរុស្ស៊ី និងអ៊ុយក្រែនក្នុងនាមជាអ្នកឆ្លើយឆ្លងព័ត៌មាននៅក្នុងការិយាល័យក្រុងម៉ូស្គូរបស់ Wall Street Journal។

របាយការណ៍ចុងក្រោយរបស់គាត់ដែលត្រូវបានបោះពុម្ពផ្សាយក្នុងសប្តាហ៍នេះ បានផ្តោតលើការធ្លាក់ចុះនៃសេដ្ឋកិច្ចរុស្ស៊ីចំពេលមានការដាក់ទណ្ឌកម្មរបស់លោកខាងលិច ។

មុនពេលចូលរួមជាមួយកាសែត Wall Street Journal លោក Gershkovich អាយុ 31 ឆ្នាំបានធ្វើការឱ្យ AFP នៅទីក្រុងម៉ូស្គូ។ ពីមុនគាត់ជាអ្នករាយការណ៍សម្រាប់កាសែត The Moscow Times ។ លោក Gershkovich និយាយភាសារុស្ស៊ី ។ ឪពុកម្តាយរបស់គាត់រស់នៅសហរដ្ឋអាមេរិក ប៉ុន្តែមានដើមកំណើតមកពីសហភាពសូវៀត។