រដ្ឋមន្ត្រីពាណិជ្ជកម្មអូស្ត្រាលី លោក Don Farrell បាននិយាយកាលពីថ្ងៃចន្ទថា លោកបានយល់ព្រមក្នុងជំនួបផ្ទាល់ជាមួយសមភាគីចិន លោក Wang Wentao នៅទីក្រុងប៉េកាំង នាពេលខាងមុខ ដែលជាសញ្ញាចុងក្រោយបង្អស់ដែលបង្ហាញថាទំនាក់ទំនងរវាងប្រទេសទាំងពីរនេះកំពុងតែប្រសើរឡើង។ដោយ លោក Farrell បាននិយាយបន្ទាប់ពីកិច្ចប្រជុំតាមវីដេអូ ជាលើកដំបូងរវាងរដ្ឋមន្ត្រីពាណិជ្ជកម្មនៃប្រទេសទាំងពីរចាប់តាំងពីឆ្នាំ 2019 ថា កិច្ចប្រជុំរបស់យើងតំណាងឱ្យជំហានដ៏សំខាន់មួយផ្សេងទៀតនៅក្នុងស្ថិរភាពនៃទំនាក់ទំនងរបស់ប្រទេសអូស្ត្រាលីជាមួយប្រទេសចិន។
លោកបានបន្តថា ការពិភាក្សារបស់យើងបានគ្របដណ្តប់លើបញ្ហាពាណិជ្ជកម្ម និងការវិនិយោគជាច្រើន រួមទាំងតម្រូវការសម្រាប់ការបន្តពាណិជ្ជកម្មដែលគ្មានការរារាំងដល់ការនាំចេញរបស់អូស្ត្រាលី ដូច្នេះអ្នកប្រើប្រាស់ចិននៅតែអាចបន្តទទួលបានអត្ថប្រយោជន៍ពីផលិតផលអូស្ត្រាលីដែលមានគុណភាពខ្ពស់ដដែល។
ក្រោយមក ការិយាល័យរបស់លោក Farrell បាននិយាយនៅក្នុងសេចក្តីថ្លែងការណ៍មួយថា រដ្ឋមន្ត្រីទាំងពីរបានយល់ព្រមបង្កើនការសន្ទនានៅគ្រប់កម្រិត រួមទាំងរវាងមន្ត្រីផងដែរ ដែលជាផ្លូវមួយឆ្ពោះទៅរកការបន្តពាណិជ្ជកម្មឡើងវិញទាន់ពេលវេលា និងពេញលេញ។ហើយសេចក្តីថ្លែងការណ៍ក៏បានបន្ថែមថា ភាគីទាំងពីរបានព្រមព្រៀងគ្នាក្នុងការស្វែងរកមធ្យោបាយបន្ថែមទៀតដើម្បីធ្វើកិច្ចសហប្រតិបត្តិការ រួមទាំងការស្តីពីការប្រែប្រួលអាកាសធាតុ និងការលើកទឹកចិត្តគណៈប្រតិភូធុរកិច្ចទាំងអស់។
គួរឱ្យដឹងដែរថា កិច្ចប្រជុំនេះបានធ្វើឡើងនៅប៉ុន្មានសប្តាហ៍បន្ទាប់ពីមន្ត្រីចិនបានបន្ធូរបន្ថយការហាមឃាត់ការនាំចូលធ្យូងថ្មរបស់អូស្ត្រាលី ខណៈដែលប្រទេសទាំងពីរកំពុងធ្វើការដើម្បីកែលម្អទំនាក់ទំនងការទូត បន្ទាប់ពីមានការដាក់ទណ្ឌកម្មពាណិជ្ជកម្មរបស់ចិនអស់រយៈពេលជាងពីរឆ្នាំ ដែលបានបង្កកការនាំចេញនូវ barley ធ្យូងថ្ម ស្រា ទំនិញ និងសេវាកម្មផ្សេងទៀតរបស់អូស្ត្រាលីមកនោះ។
Source: RT
By Chanratanak
