សេវាកម្មសង្គ្រោះបន្ទាន់ក្នុងតំបន់បានប្រាប់សារព័ត៌មានរដ្ឋរុស្ស៊ី TASS នៅថ្ងៃសុក្រនេះថា យន្តហោះចម្បាំង MiG-31 មួយគ្រឿងបានធ្លាក់នៅតំបន់ Primorsky ក្នុងតំបន់ចុងបូព៌ារបស់រុស្ស៊ី ហើយក្រុមនាវិកបានផ្ដាច់ខ្លួនចេញពីយន្តហោះចម្បាំងនេះទាន់ពេល។
សេវាសង្គ្រោះបន្ទាន់បាននិយាយថា “យន្តហោះចម្បាំង MiG-31 មួយគ្រឿងបានធ្លាក់ភ្លាមៗបន្ទាប់ពីការហោះហើររបស់វា ។ វាបានធ្លាក់នៅក្នុងព្រៃក្បែរភូមិ Alekseevka ។ សេវាសង្គ្រោះបន្ទាន់បានបន្ថែមថា “យោងតាមទិន្នន័យបឋមមិនមានអ្នកស្លាប់ ឬការខូចខាតទេ”។ យន្តហោះនេះបានធ្វើការហោះហើរដោយមិនមានផ្ទុកអាវុធទេ ។ យោងតាមព័ត៌មានបឋម កំហុសបច្ចេកទេសអាចបណ្តាលឱ្យធ្លាក់។
យន្តហោះចម្បាំង MiG-31 គឺជាយន្តហោះចម្បាំងប្រភេទ Supersonic រយៈចម្ងាយឆ្ងាយដែលផលិតដោយរុស្ស៊ី និងជាយន្តហោះចម្បាំងអាចតស៊ូបានក្នុងគ្រប់អាកាសធាតុ ។ យន្តហោះនេះមានកាំភ្លើងកាណុង៦ទំហំ២៣មីលីម៉ែត្រ ។ MiG-31 អាចបាញ់មីស៊ីលពីអាកាសទៅអាកាស និងពីអាកាសទៅដី គ្រាប់បែកអាកាស និងមីស៊ីលលឿនជាងសំឡេងផងដែរ ។
ប្រភព ៖
TASS