យោងតាមអភិបាលនៃតំបន់ព្រំដែនភាគនិរតីនៃប្រទេសរុស្ស៊ី បាននិយាយថា អាកាសយានដ្ឋានមួយនៅក្នុងទីក្រុង Kursk ត្រូវបានគេកំណត់គោលដៅក្នុងការវាយប្រហារដោយយន្តហោះគ្មានមនុស្សបើក ។ ការវាយប្រហារនេះកើតឡើងមួយថ្ងៃបន្ទាប់ពីមូលដ្ឋានទ័ពអាកាសរុស្ស៊ីពីរនៅក្នុងតំបន់ Ryazan និង Saratov ដែលនៅឆ្ងាយពីព្រំដែនត្រូវបានតម្រង់គោលដៅដោយអាវុធស្រដៀងគ្នានេះ ។
អភិបាលតំបន់ Kursk លោក Roman Starovoyt បាននិយាយនៅក្នុងសារ Telegram នៅព្រឹកថ្ងៃអង្គារ ប្រហែលម៉ោង 7 និង 20 នាទីព្រឹកម៉ោងក្នុងស្រុកថា “ជាលទ្ធផលនៃការវាយប្រហារដោយយន្តហោះគ្មានមនុស្សបើក ធុងស្តុកប្រេងមួយបានឆេះនៅក្នុងតំបន់នៃអាកាសយានដ្ឋាន Kursk ។ ភ្នាក់ងារសង្គ្រោះបន្ទាន់ទាំងអស់គឺនៅនឹងកន្លែង” ។
មិនមានអ្នករងរបួសទេនេះបើតាមព័ត៌មានបឋមដែលចែកចាយដោយអភិបាលខេត្ត។
យោងតាមក្រសួងការពារជាតិរុស្ស៊ី បានឱ្យដឹងថា កាលពីថ្ងៃចន្ទ យន្តហោះគ្មានមនុស្សបើកមួយចំនួន “ផលិតដោយសូវៀត” ដែលហោះហើរក្នុងរយៈកម្ពស់ទាបបានកំណត់គោលដៅលើហេដ្ឋារចនាសម្ព័ន្ធអាកាសចរណ៍យុទ្ធសាស្ត្ររយៈចម្ងាយឆ្ងាយនៅឯអាកាសយានដ្ឋាន Dyagilevo ក្នុងតំបន់ Ryazan និងអាកាសយានដ្ឋាន Engels ក្នុងតំបន់ Saratov នេះបើយោងតាមក្រសួងការពារជាតិរុស្ស៊ី ។
ប្រភព ៖
RT