ព្យុះទីហ្វុង Nanmadol បាននាំមកនូវខ្យល់បក់បោកយ៉ាងខ្លាំង និងភ្លៀងធ្លាក់យ៉ាងខ្លាំងទៅកាន់ភាគខាងលិចប្រទេសជប៉ុនកាលពីថ្ងៃចន្ទ ខណៈដែលព្យុះដ៏ធំបំផុតមួយដែលបានវាយប្រហារប្រទេសនេះក្នុងរយៈពេលជាច្រើនឆ្នាំបានសម្លាប់មនុស្សយ៉ាងហោចណាស់ 2 នាក់ រំខានដល់ការដឹកជញ្ជូន និងបង្ខំឱ្យក្រុមហ៊ុននានាផ្អាកប្រតិបត្តិការផលិតរបស់ខ្លួន ។ នេះបើយោងតាមការចេញផ្សាយដោយសារព័ត៌មាន NHK ។
នាយករដ្ឋមន្ត្រីជប៉ុនលោក Fumio Kishida បានពន្យារពេលការចាកចេញរបស់លោកទៅកាន់ទីក្រុងញូវយ៉ក ជាកន្លែងដែលលោកនឹងត្រូវថ្លែងសុន្ទរកថានៅឯមហាសន្និបាតអង្គការសហប្រជាជាតិ។
លោក Kishida បានប្រាប់អ្នកយកព័ត៌មាននៅល្ងាចថ្ងៃចន្ទថា “ខ្ញុំបានពន្យារពេលការចេញដំណើរតាមកាលវិភាគរបស់ខ្ញុំនៅថ្ងៃនេះ ដើម្បីរងចាំមើលការខូចខាតដែលបង្កឡើងដោយព្យុះទីហ្វុង និងចាត់វិធានការទាំងអស់សម្រាប់ការស្តារប្រទេសឡើងវិញ” ។ “បើកាលៈទេសៈអនុញ្ញាត ខ្ញុំនឹងចាកចេញនៅព្រឹកស្អែក”។
ទន្លេមួយក្នុងខេត្ត Miyazaki របស់ Kyushu មានទឹកហូរហៀរ ជន់លិចវាលស្រែ និងផ្លូវថ្នល់ ។ វីដេអូផ្សេងទៀតបានបង្ហាញពីផ្ទះមួយខ្នងនៅមាត់ទន្លេត្រូវបានទឹកហូរនាំយកទៅជាមួយ ដំបូលសង្កសីបានរហែកចេញពីស្ថានីយ៍ប្រេងឥន្ធនៈ និងផ្ទាំងប៉ាណូបានដួលរលំនៅលើផ្លូវ ។
