រដ្ឋាភិបាលចិនបាននិយាយនៅក្នុងសេចក្តីជូនដំណឹងមួយចុះថ្ងៃទី 21 ខែសីហាថា ទីក្រុង Chongqing របស់ប្រទេសចិនកំពុងកាត់បន្ថយម៉ោងបើករបស់ផ្សារទំនើបចាប់ពីថ្ងៃចន្ទនេះ ដោយសារតែស្ថានភាពផ្គត់ផ្គង់ថាមពល ស្ថិតក្នុងស្ថានភាពបន្ទាន់ដែលបណ្តាលមកពីរលកកំដៅនាពេលថ្មីៗនេះ ។
វិធានការនេះមានន័យថាផ្សារទំនើបរាប់សិបកន្លែងនៅទូទាំងទីក្រុងភាគនិរតីត្រូវកែសម្រួលម៉ោងធ្វើការដោយបើកពីម៉ោង៤ដល់៩យប់ ។ គណៈកម្មការសេដ្ឋកិច្ច និងព័ត៌មានទីក្រុង Chongqing បាននិយាយថា ដើម្បី “ធានាបាននូវការផ្គត់ផ្គង់ថាមពលប្រកបដោយសុវត្ថិភាព និងសណ្តាប់ធ្នាប់ និងធានានូវតម្រូវការជាមូលដ្ឋានរបស់មហាជន” នេះបើយោងតាមការចេញផ្សាយដោយសារព័ត៌មាន Reuters ។
សេចក្តីជូនដំណឹងបាននិយាយថា វិធានការនេះនឹងបន្តរហូតដល់មានសេចក្ដីប្រកាសបន្ថែមពីអាជ្ញាធរដោយផ្អែកលើសីតុណ្ហភាព និងការផ្គត់ផ្គង់ និងស្ថានភាពតម្រូវការ ។