ប្រធានាធិបតីអ៊ុយក្រែន វ៉ូឡូឌីមៀរ ហ្សេលេនស្គី បាននិយាយថា អ៊ុយក្រែននឹងមិនចុះចាញ់លើការប្រយុទ្ធគ្នានៅទីក្រុង Bakhmut នៅភាគខាងកើតនៃប្រទេសនេះទេ ខណៈកងកម្លាំងរបស់ទីក្រុងម៉ូស្គូបន្តការវាយលុករបស់ពួកគេប្រឆាំងនឹងទីក្រុងដែលមេដឹកនាំអ៊ុយក្រែនបានពិពណ៌នាថាជាបន្ទាយដ៏រឹងមាំរបស់ខ្លួន ។
ទីក្រុងដែលមានការប្រយុទ្ធយ៉ាងក្តៅគគុកនៅក្នុងតំបន់ Donetsk នេះបានក្លាយជាចំណុចកណ្តាលនៃការប្រយុទ្ធជាច្រើនខែ ហើយលោក ហ្សេលេនស្គី បាននិយាយកាលពីថ្ងៃសុក្រថា កងកម្លាំងអ៊ុយក្រែននឹងបន្តរក្សាការពារទីក្រុងនេះឱ្យបានយូរតាមដែលអាចធ្វើទៅបាន ក្នុងអំឡុងពេលកិច្ចប្រជុំកំពូលនៅទីក្រុង គៀវ ជាមួយមេដឹកនាំសហភាពអឺរ៉ុប ។
“គ្មាននរណាម្នាក់នឹងចុះចាញ់នៅក្នុងទីក្រុង Bakhmut ទេ។ យើងនឹងប្រយុទ្ធឱ្យបានយូរតាមដែលអាចធ្វើទៅបាន” លោក ហ្សេលេនស្គី បាននិយាយដោយឈរកៀកស្មាជាមួយប្រធានក្រុមប្រឹក្សាអឺរ៉ុបលោក Charles Michel ដែលនៅក្នុងដំណើរទស្សនកិច្ចលើកទីពីររបស់គាត់ទៅកាន់ទីក្រុងគៀវក្នុងរយៈពេលតិចជាងបីសប្តាហ៍ និងប្រធានគណៈកម្មការអឺរ៉ុបលោកស្រី Ursula von der Leyen ។ .
លោក ហ្សេលេនស្គី បានបន្ថែមថា “ប្រសិនបើការដឹកជញ្ជូនអាវុធត្រូវបានពន្លឿន ពោលគឺការបញ្ជូនអាវុធរយៈចម្ងាយឆ្ងាយ យើងនឹងមិនត្រឹមតែមិនដកខ្លួនចេញពីទីក្រុង Bakhmut ប៉ុណ្ណោះទេ ប៉ុន្តែយើងនឹងចាប់ផ្តើមរំដោះតំបន់ Donbas មកវិញ ។
ទីក្រុងម៉ូស្គូបាននិយាយកាលពីថ្ងៃទី ១ កុម្ភៈថា កងកម្លាំងរុស្ស៊ីបាននឹងកំពុងឡោមព័ទ្ធទីក្រុង Bakhmut ពីទិសដៅជាច្រើន និងប្រយុទ្ធដើម្បីគ្រប់គ្រងផ្លូវហាយវេដែលជាផ្លូវផ្គត់ផ្គង់ដ៏សំខាន់សម្រាប់កងកម្លាំងអ៊ុយក្រែនផងដែរ ។
ប្រភព ៖ Al Jazeera
By Suon Visal
