ប្រធានាធិបតីអ៊ុយក្រែនលោក វ៉ូឡូឌីមៀរ ហ្សេលេនស្គី បានបដិសេធការនិយាយថា សង្គ្រាមជាមួយរុស្ស៊ីបានឈានដល់ភាពជាប់គាំងហើយបាននិយាយថា ត្រូវការការងារបន្ថែមទៀតជាមួយសម្ពន្ធមិត្ត ដើម្បីពង្រឹងការការពារដែនអាកាសរបស់អ៊ុយក្រែន ។
ការអត្ថាធិប្បាយរបស់គាត់បានកើតឡើងប៉ុន្មានថ្ងៃបន្ទាប់ពីអគ្គមេបញ្ជាការនៃប្រទេសអ៊ុយក្រែន ឧត្តមសេនីយ Valery Zaluzhnyi បាននិយាយនៅក្នុងអត្ថបទមួយថា ជម្លោះកំពុងឆ្ពោះទៅរកដំណាក់កាលថ្មីនៃការប្រយុទ្ធគ្នាដោយជាប់គាំង និងជាដំណាក់កាលមួយដែលអាចអនុញ្ញាតឱ្យទីក្រុងម៉ូស្គូអាចកសាងអំណាចយោធាឡើងវិញ។
មេដឹកនាំអ៊ុយក្រែនក៏បានច្រានចោលនូវគំនិតដែលបណ្តាប្រទេសលោកខាងលិចកំពុងដាក់សម្ពាធលើទីក្រុងគៀវឱ្យចូលទៅក្នុងការចរចាជាមួយរុស្ស៊ី ចំពេលមានរបាយការណ៍ថាមន្ត្រីអាម៉េរិក និងសហភាពអឺរ៉ុបបានពិភាក្សាគ្នាអំពីអ្វីដែលកិច្ចពិភាក្សាបែបនេះនឹងមាន ។
ជាមួយនឹងសង្រ្គាមនៅពេលនេះនៅក្នុងខែទី ២០ ហើយអ៊ុយក្រែនកំពុងតស៊ូដើម្បីរំដោះទឹកដីនៅក្នុងការវាយលុករបស់ខ្លួនលោក ហ្សេលេនស្គី បានជួបជាមួយមេដឹកនាំលោកខាងលិចជាប្រចាំក្នុងគោលបំណង ដើម្បីបំបាត់ភាពធុនទ្រាន់ជាមួយនឹងជម្លោះ។
លោក ហ្សេលេនស្គី បាននិយាយថា សង្រ្គាមរវាងអ៊ីស្រាអែល និងក្រុមហាម៉ាស់ ក៏បានទាក់ទាញការយកចិត្តទុកដាក់ពីអ៊ុយក្រែនផងដែរ ហើយបាននិយាយថា នេះគឺជា “គោលដៅរបស់រុស្ស៊ី” ។ លោកបាននិយាយថា “យើងបានស្ថិតក្នុងស្ថានភាពលំបាកខ្លាំងរួចទៅហើយ នៅពេលដែលស្ទើរតែគ្មានការផ្តោតអារម្មណ៍លើអ៊ុយក្រែន” គាត់បាននិយាយថា “ខ្ញុំប្រាកដណាស់ថាយើងនឹងយកឈ្នះលើបញ្ហាប្រឈមនេះ” ។
អ្នកគាំទ្រអ៊ុយក្រែន រួមទាំងសហរដ្ឋអាម៉េរិក បានរក្សាជំហរថា ពួកគេបានត្រៀមខ្លួនរួចជាស្រេច ដើម្បីគាំទ្រដល់ទីក្រុងគៀវជាមួយនឹងការគាំទ្រផ្នែកយោធា និងហិរញ្ញវត្ថុ ដរាបណាអ៊ុយក្រែនត្រូវការដើម្បីកម្ចាត់រុស្ស៊ី។
AFP
