មេដឹកនាំចិនលោក ស៊ី ជីនពីង នឹងធ្វើដំណើរទៅកាន់ប្រទេសរុស្ស៊ីក្នុងដំណើរបំពេញទស្សនកិច្ចផ្លូវរដ្ឋនៅសប្តាហ៍ក្រោយ ដែលជាដំណើរទស្សនកិច្ចលើកដំបូងរបស់លោកទៅកាន់ប្រទេសរុស្ស៊ីចាប់តាំងពីវាបានឈ្លានពានអ៊ុយក្រែន។
លោក ស៊ី ជីនពីង នឹងស្ថិតនៅក្នុងប្រទេសរុស្ស៊ីចាប់ពីថ្ងៃទី ២០ ដល់ថ្ងៃទី ២២ ខែមីនា នេះបើយោងតាមសេចក្តីថ្លែងការណ៍របស់ក្រសួងការបរទេសចិនចេញកាលពីរសៀលថ្ងៃសុក្រ ។ វានឹងក្លាយជាដំណើរទៅក្រៅប្រទេសលើកដំបូងរបស់លោកចាប់តាំងពីលោកបានឈ្នះអាណត្តិទីបីជាប្រធានាធិបតីចិនកាលពីដើមខែនេះ ។
ក្នុងអំឡុងពេលនៃដំណើរទស្សនកិច្ចនេះ លោក ស៊ី ជីនពីង ត្រូវបានគេរំពឹងថានឹងពិភាក្សាអំពីគម្រោងផែនការសន្តិភាពចំនួន ១២ ចំណុចរបស់ប្រទេសចិនដែលបានចេញផ្សាយនាពេលថ្មីៗនេះសម្រាប់ការបញ្ចប់សង្រ្គាមនៅអ៊ុយក្រែន ដែលជាឯកសារដែលត្រូវបានច្រានចោលដោយរដ្ឋាភិបាលលោកខាងលិចភាគច្រើន ។
លោក ស៊ី ជីនពីង និងមេដឹកនាំអ៊ុយក្រែនលោក វ៉ូឡូឌីមៀរ ហ្សេលេនស្គី ក៏មានគម្រោងជួបពិភាក្សាគ្នាតាមខ្សែវីដេអូក្នុងពេលឆាប់ៗនេះនៅក្នុងអ្វីដែលនឹងក្លាយជាការសន្ទនាលើកដំបូងរបស់មេដឹកនាំទាំង២ចាប់តាំងពីការឈ្លានពានរបស់រុស្ស៊ី នេះបើតាមមន្ត្រីអ៊ុយក្រែនដែលដឹងពីការត្រៀមរៀបចំបាននិយាយ ។
រដ្ឋមន្ត្រីការបរទេសចិនលោក Qin Gang បាននិយាយកាលពីថ្ងៃព្រហស្បតិ៍ជាមួយសមភាគីអ៊ុយក្រែនរបស់លោក Dmytro Kuleba អំពីទំនាក់ទំនងទ្វេភាគី និងការឈ្លានពានរបស់រុស្ស៊ី ។ ការហៅទូរស័ព្ទដែលអាចកើតមានរវាងលោក ស៊ី ជីនពីង និងលោកប្រធានាធិបតី ចូ បៃដិន ក៏មាននៅលើលទ្ធភាពដែលអាចកើតឡើងផងដែរ ។
ប្រភព ៖ Bloomberg
By Suon Visal
