នាយករដ្ឋមន្រ្តីស្ដីទីរបស់ថៃបានគេងលក់ពេលកំពុងប្រជុំ

(05 កញ្ញា 2022) មានការចែករំលែកពេញបណ្ដាញទំនាក់ទំនងសង្គមនូវរូបភាពរបស់លោកឧត្តមសេនីយ៍ Prawit Wongsuwan ឧបនាយករដ្ឋមន្ត្រី រដ្ឋមន្រ្តីក្រសួងការពារជាតិ និងជានាយករដ្ឋមន្រ្តីស្ដីទីរបស់ប្រទេសថៃ ដែលមើលទៅដូចជាសម្រាន្ដលក់ក្នុងកិច្ចប្រជុំមួយក្នុងខេត្ត Krabi ប្រទេសថៃ ។ នេះបើយោងតាមការចុះផ្សាយសារព័ត៌មានថៃ Daily News ។

ថ្មីៗនេះ លោក Chaiwut Thanakmanusorn រដ្ឋមន្រ្តីក្រសួងឌីជីថលដើម្បីសេដ្ឋកិច្ច និងសង្គម (DES) និងជាអនុប្រធានគណបក្ស Palang Pracharath Party បានចេញមកឆ្លើយតបទៅនឹងរឿងនេះថា លោក ឧត្តមសេនីយ៍ Prawit Wongsuwan ពុំបានសម្រាន្ដលក់ក្នុងកិច្ចប្រជុំនោះទេ វាអាចគ្រាន់តែជារូបភាពដែលថតបាននៅពេលគាត់ព្រិចភ្នែកតែប៉ុណ្ណោះ

លោក Chaiwut Thanakmanusorn ក៏បានបន្ថែមផងដែរថា រូបលោកផ្ទាល់ក៏បាននៅក្នុងកិច្ចប្រជុំនោះផងដែរ ខ្ញុំឃើញឧត្តមសេនីយ៍ Prawit Wongsuwan គាត់ឆ្លើយឆ្លងជាធម្មតា គាត់ពុំបានសម្រាន្តលក់ដូចការលើកឡើងនោះទេ សូមកុំនាំគ្នាធ្វើការចាប់កំហុស វាមិនសមរម្យនោះទេ