នាយករដ្ឋមន្រ្តីប៉ូឡូញបានប្រាប់ប្រធានាធិបតីអ៊ុយក្រែនលោក វ៉ូឡូឌីមៀរ ហ្សេលេនស្គី កាលពីថ្ងៃសុក្រថាកុំឱ្យប្រមាថប៉ូឡូញម្ដងទៀត បន្ទាប់ពីប្រធានាធិបតីប៉ូឡូញបានព្យាយាមដោះស្រាយជម្លោះដែលកំពុងឆាបឆេះលើការនាំចូលគ្រាប់ធញ្ញជាតិរវាងប្រទេសទាំង ២ ។
ប្រទេសប៉ូឡូញបានសម្រេចចិត្តកាលពីសប្តាហ៍មុន បន្តការហាមឃាត់លើការនាំចូលគ្រាប់ធញ្ញជាតិរបស់អ៊ុយក្រែន ដោយធ្វើឱ្យមានការរង្គោះរង្គើទំនាក់ទំនងរបស់ទីក្រុងគៀវ ជាមួយប្រទេសជិតខាងដែលត្រូវបានគេមើលឃើញថាជា សម្ពន្ធមិត្តដ៏រឹងមាំបំផុតរបស់ខ្លួនចាប់តាំងពីរុស្ស៊ីបានឈ្លានពានអ៊ុយក្រែនកាលពីខែកុម្ភៈឆ្នាំមុន ។
លោក ហ្សេលេនស្គី បានធ្វើឱ្យអ្នកជិតខាងរបស់គាត់ខឹងនៅពេលគាត់បានប្រាប់មហាសន្និបាតអង្គការសហប្រជាជាតិនៅទីក្រុងញូវយ៉កថា ទីក្រុងគៀវកំពុងធ្វើការដើម្បីរក្សាផ្លូវសម្រាប់ការនាំចេញគ្រាប់ធញ្ញជាតិ ប៉ុន្តែថា “ល្ខោននយោបាយ” ជុំវិញការនាំចូលគ្រាប់ធញ្ញជាតិ គឺគ្រាន់តែជួយក្រុងម៉ូស្គូប៉ុណ្ណោះ ។ នាយករដ្ឋមន្ត្រីប៉ូឡូញលោក Mateusz Morawiecki បាននិយាយឆ្លើយតបថា “ខ្ញុំចង់ប្រាប់ប្រធានាធិបតី ហ្សេលេនស្គី កុំឱ្យប្រមាថប៉ូឡូញម្តងទៀត ដូចដែលគាត់បានធ្វើនាពេលថ្មីៗនេះ ក្នុងអំឡុងសុន្ទរកថារបស់គាត់នៅអង្គការសហប្រជាជាតិ” ។
ប្រទេសប៉ូឡូញបាននិយាយកាលពីថ្ងៃពុធថា ខ្លួននឹងបញ្ឈប់ការផ្តល់អាវុធដល់អ៊ុយក្រែន ចំពេលមានជម្លោះកាន់តែខ្លាំងឡើងរវាងប្រទេសទាំងពីរជុំវិញការហាមឃាត់បណ្តោះអាសន្នលើការនាំចូលគ្រាប់ធញ្ញជាតិរបស់អ៊ុយក្រែន ។ នាយករដ្ឋមន្ត្រីប៉ូឡូញ លោក Mateusz Morawiecki បាននិយាយនៅលើប្រព័ន្ធផ្សព្វផ្សាយសង្គមថា “យើងលែងផ្ទេរសព្វាវុធទៅអ៊ុយក្រែនទៀតហើយ ពីព្រោះឥឡូវនេះយើងកំពុងបំពាក់អាវុធដល់ប្រទេសប៉ូឡូញ” ។ អានបន្ត
កាលពីព្រឹកថ្ងៃសុក្រ ប្រធានាធិបតីប៉ូឡូញលោក Andrzej Duda បាននិយាយថា ជម្លោះរវាងប៉ូឡូញ និងអ៊ុយក្រែន លើការនាំចូលគ្រាប់ធញ្ញជាតិ នឹងមិនប៉ះពាល់ខ្លាំងដល់ទំនាក់ទំនងទ្វេភាគីល្អ ក្នុងការផ្លាស់ប្តូរជាក់ស្តែង ដើម្បីបន្ធូរបន្ថយភាពតានតឹង។ លោកមិនជឿថា ជម្លោះនេះអាចមានឥទ្ធិពលខ្លាំងដល់ពួកគេទេ ដូច្នេះយើងត្រូវដោះស្រាយបញ្ហានេះ ។
Reuters
