ប្រព័ន្ធផ្សព្វផ្សាយជប៉ុនបានលាតត្រដាងថា អឺរ៉ុបលួចនាំចូលប្រេងពីរុស្ស៊ី ប៉ុន្តែពួកគេលាក់បាំងព័ត៌មាននេះ ។ រយៈកាល 6ខែចុងក្រោយនេះ មាននាវាដឹកប្រេងរាប់សិបគ្រឿង បានផ្ទេរប្រេងចេញពី នាវាដឹកប្រេងដែលមានប្រភពចេញពីរុស្ស៊ី ពីឆ្នេរសមុទ្រនៃប្រទេសក្រិក បន្ទាប់មកធ្វើដំណើរទៅកាន់កំពង់ផែអឺរ៉ុប នេះបើយោងតាមរបាយការណ៍របស់បណ្ដាញសារព័ត៌មាន Nikkei ដែលជាកាសែតពាណិជ្ជកម្មឈានមុខគេរបស់ប្រទេសជប៉ុនកាលពីប៉ុន្មានថ្ងៃកន្លងមកនេះ ។
របាយការណ៍របស់បណ្ដាញសារព័ត៌មាន Nikkei បានឱ្យដឹងថា មាននាវាដឹកប្រេងជាច្រើនគ្រឿងបានធ្វើការផ្ទេរប្រេងនៅកណ្តាលសមុទ្រ ដើម្បីលាក់បាំងប្រភព ជាច្រើនខែកន្លងមកនេះ បន្ទាប់ពីទណ្ឌកម្មប្រេងលើប្រទេសរុស្ស៊ីចូលជាធរមាន ។
ការស្រាវជ្រាវរបស់បណ្ដាញសារព័ត៌មាន Nikkei បានគូសបញ្ជាក់ថា ដែនទឹកក្បែរប្រទេសក្រិក ដើរតួនាទីយ៉ាងសំខាន់ ជាមជ្ឈមណ្ឌលចែកចាយប្រេងរវាងរុស្ស៊ី និងអឺរ៉ុប ។
