ក្រសួងការបរទេសតួកគីបាននិយាយនៅថ្ងៃសៅរ៍នេះថា ខ្លួនមិនទទួលស្គាល់ការបញ្ចូលតំបន់ចំនួន 4 របស់រុស្ស៊ីនៅក្នុងអ៊ុយក្រែន ដោយបន្ថែមថាការសម្រេចចិត្តនេះគឺជាការរំលោភយ៉ាងធ្ងន់ធ្ងរនៃច្បាប់អន្តរជាតិ ។
ប្រទេសតួកគីដែលជាសមាជិកអង្គការណាតូបានធ្វើសកម្មភាពអព្យាក្រឹត្យផ្នែកការទូតចាប់តាំងពីរុស្ស៊ីបានឈ្លានពានអ៊ុយក្រែនកាលពីថ្ងៃទី 24 ខែកុម្ភៈ ។ ទីក្រុងអង់ការ៉ាប្រឆាំងនឹងការដាក់ទណ្ឌកម្មរបស់លោកខាងលិចលើរុស្ស៊ី និងមានទំនាក់ទំនងយ៉ាងជិតស្និទ្ធជាមួយទាំងទីក្រុងម៉ូស្គូ និងទីក្រុងគៀវ ដែលជាប្រទេសជិតខាងសមុទ្រខ្មៅរបស់ខ្លួន ។ តួកគីក៏បានរិះគន់ការឈ្លានពានរបស់រុស្ស៊ី និងបានបញ្ជូនយន្តហោះគ្មានមនុស្សបើក និងអាវុធទៅកាន់អ៊ុយក្រែនផងដែរ ។
ក្រសួងការបរទេសតួកគីបាននិយាយថា ខ្លួនមិនបានទទួលស្គាល់ការបញ្ចូលតំបន់គ្រីមៀររបស់រុស្ស៊ីក្នុងឆ្នាំ 2014 ដោយបន្ថែមថាខ្លួនបដិសេធការសម្រេចចិត្តរបស់រុស្ស៊ីក្នុងការបញ្ចូលតំបន់ទាំងបួនគឺ Donetsk, Luhansk, Kherson និង Zaporizhzhia ។
ប្រភព ៖ Reuters