ក្រសួងការបរទេសចិនបានប្រកាសកាលពីថ្ងៃសុក្រថា រដ្ឋាភិបាលចិនគ្រោងនឹងដាក់ទណ្ឌកម្មលើលោក Gregory Hayes នាយកប្រតិបត្តិ និងជាប្រធានក្រុមហ៊ុន Raytheon Technologies និងលោក Ted Colbert ប្រធាន និងជានាយកប្រតិបត្តិនៃក្រុមហ៊ុន Boeing Defence, Space and Security បន្ទាប់ពីការលក់អាវុធថ្មីៗរបស់សហរដ្ឋអាម៉េរិកទៅកាន់កោះតៃវ៉ាន់ ។ នេះបើយោងតាមការចេញផ្សាយដោយសារព័ត៌មានរដ្ឋចិន Global Times ។
លោក Mao Ning អ្នកនាំពាក្យរបស់ក្រសួងបាននិយាយនៅក្នុងសន្និសីទសារព័ត៌មាននៅថ្ងៃសុក្រថា ទណ្ឌកម្មត្រូវបានដាក់ក្នុងគោលបំណងដើម្បីការពារអធិបតេយ្យភាព និងផលប្រយោជន៍សន្តិសុខរបស់ប្រទេសចិន ខណៈដែលក្រុមហ៊ុនទាំងពីរបានជាប់ពាក់ព័ន្ធក្នុងការលក់អាវុធចុងក្រោយរបស់សហរដ្ឋអាម៉េរិកទៅកាន់កោះតៃវ៉ាន់ ។
ការលក់សព្វាវុធរបស់សហរដ្ឋអាម៉េរិកទៅកាន់កោះតៃវ៉ាន់គឺជាការបំពានយ៉ាងធ្ងន់ធ្ងរលើគោលការណ៍ចិនតែមួយ និងបទប្បញ្ញត្តិនៃសេចក្តីថ្លែងការណ៍រួមទាំងបីរបស់ចិន និងសហរដ្ឋអាម៉េរិក ជាពិសេសសេចក្តីថ្លែងការណ៍ថ្ងៃទី 17 ខែសីហា ។ ការលក់សព្វាវុធបានធ្វើឱ្យប៉ះពាល់ដល់អធិបតេយ្យភាព និងផលប្រយោជន៍សន្តិសុខរបស់ចិនយ៉ាងធ្ងន់ធ្ងរ ហើយប៉ះពាល់យ៉ាងធ្ងន់ធ្ងរដល់ទំនាក់ទំនងរវាងចិន និងសហរដ្ឋអាម៉េរិក និងសន្តិភាព និងស្ថិរភាពនៅច្រកសមុទ្រតៃវ៉ាន់ ។
លោក Mao បានសង្កត់ធ្ងន់ថា ប្រទេសចិនជំរុញឱ្យសហរដ្ឋអាម៉េរិក និងភាគីពាក់ព័ន្ធបញ្ឈប់កិច្ចព្រមព្រៀងសព្វាវុធជាមួយតៃវ៉ាន់ ឬបង្កើតភាពតានតឹងនៅទូទាំងច្រកសមុទ្រតៃវ៉ាន់ ដោយកត់សម្គាល់ថា ប្រទេសចិននឹងបន្តចាត់វិធានការចាំបាច់ទាំងអស់ដើម្បីការពារយ៉ាងម៉ឺងម៉ាត់នូវអធិបតេយ្យភាព និងផលប្រយោជន៍សន្តិសុខរបស់ខ្លួន ក្រោមការវិវត្តន៍នៃស្ថានភាពក្នុងតំបន់ ។
