ក្រសួងការបរទេសចិនបាននិយាយកាលពីថ្ងៃសុក្រថា ប្រទេសចិនបានកោះហៅឯកអគ្គរដ្ឋទូតជប៉ុន និងប្រេសិតបណ្តាប្រទេសនៅអឺរ៉ុប ដើម្បីធ្វើការជំទាស់ទៅនឹងសេចក្តីថ្លែងការណ៍របស់ G-7 ដែលបានដាក់ចេញនៅក្នុងសប្តាហ៍នេះ ក្នុងសេចក្តីថ្លែងការណ៍នេះបានបង្ហាញពីការព្រួយបារម្ភទាក់ទងនឹងការឆ្លើយតបរបស់ទីក្រុងប៉េកាំងចំពោះដំណើរទស្សនកិច្ចរបស់ប្រធានសភាតំណាងរាស្រ្តអាម៉េរិកលោកស្រី Nancy Pelosi ទៅកាន់កោះតៃវ៉ាន់ នេះបើយោងតាមការចេញផ្សាយដោយសារព័ត៌មាន kyodo News ។
នៅថ្ងៃព្រហស្បតិ៍ទី4 ខែសីហា អនុរដ្ឋមន្ត្រីការបរទេសចិនលោក Deng Li បានកោះហៅឯកអគ្គរដ្ឋទូតជប៉ុនប្រចាំនៅប្រទេសចិនលោក Hideo Tarumi និងឯកអគ្គរដ្ឋទូតអឺរ៉ុបមកពីសមាជិកក្រុមប្រទេស G-7 ផ្សេងទៀតមកចូលរួមកិច្ចប្រជុំជាបន្ទាន់ជុំវិញសេចក្តីថ្លែងការណ៍នោះ ។