ក្រសួងការបរទេសចិនបានប្រកាសកាលពីថ្ងៃសុក្រថា ប្រទេសចិនបានសម្រេចចិត្តកាត់បន្ថយទំនាក់ទំនងការទូតជាមួយសហរដ្ឋអាម៉េរិកនៅក្នុងផ្នែកយោធា និងស៊ីវិលមួយចំនួន ។ ការបង្វែរទំនាក់ទំនងជាវិធីសងសឹករបស់ទីក្រុងប៉េកាំងសម្រាប់ដំណើរទស្សនកិច្ចនៅកោះតៃវ៉ាន់ក្នុងសប្តាហ៍នេះដោយប្រធានសភាតំណាងរាស្ត្រអាម៉េរិកលោកស្រី Nancy Pelosi នេះបើយោងតាមការចេញផ្សាយដោយសារព័ត៌មានចិន Global Times ។
ក្រសួងបានបញ្ចេញបញ្ជីតំបន់ដែលនឹងលែងមានទំនាក់ទំនងរវាងមន្ត្រីចិន និងអាម៉េរិក ដែលរួមបញ្ចូលទាំងកិច្ចប្រជុំការងាររវាងក្រសួងការពារជាតិ ការប្រឹក្សាសន្តិសុខដែនសមុទ្រ កិច្ចសហប្រតិបត្តិការលើការធ្វើចំណាកស្រុកខុសច្បាប់ ជំនួយផ្នែកតុលាការ ឧក្រិដ្ឋកម្មឆ្លងដែន ការគ្រប់គ្រងគ្រឿងញៀន និងការប្រែប្រួលអាកាសធាតុ ។ សេចក្តីថ្លែងការណ៍បាននិយាយថា ការហៅទូរស័ព្ទដែលបានគ្រោងទុករវាងមេបញ្ជាការយោធាជាន់ខ្ពស់នៃប្រទេសទាំងពីរក៏ត្រូវបានលុបចោលផងដែរ ។
នៅថ្ងៃសុក្រនេះ ក្រសួងការបរទេសចិនបានប្រកាសដាក់ទណ្ឌកម្មផ្ទាល់លើលោកស្រី Pelosi និងសមាជិកគ្រួសាររបស់លោកស្រី ។