ព្យុះទីហ្វុង Hinnamnor ខិតទៅជិតប្រទេសកូរ៉េខាងត្បូងក្នុងថ្ងៃនេះ បណ្តាលឱ្យមានភ្លៀងធ្លាក់ខ្លាំង និងខ្យល់បក់ខ្លាំងនៅតំបន់ភាគខាងត្បូងនៃប្រទេស បង្កឱ្យជើងហោះហើរជាច្រើនត្រូវបានលុបចោល អាជីវកម្ម និងសាលារៀនត្រូបានបិទជាច្រើនកន្លែង ។ អាជ្ញាធរកូរ៉េខាងត្បូងបានបង្កើនកម្រិតប្រកាសអាសន្នដល់កម្រិតខ្ពស់បំផុតជាលើកដំបូងក្នុងរយៈពេលប្រាំឆ្នាំ ចុងក្រោយនេះ ដើម្បីឆ្លើយតបនឹងព្យុះទីហ្វុងមួយនេះ ។ នេះបើយោងតាមការចេញផ្សាយដោយសារព័ត៌មាន CNA ។
ថ្មីៗនេះ មានសេចក្តីរាយការណ៍ថា ព្យុះទីហ្វុងកំពុងធ្វើដំណើរទៅភាគខាងជើងប្រទេសកូរ៉េខាងត្បូងក្នុងល្បឿន 24គីឡូម៉ែត្រក្នុងមួយម៉ោង និងត្រូវបានប៉ាន់ស្មានថា ឥទ្ធិពលនៃព្យុះទីហ្វុងនេះនឹងបណ្តាលឱ្យមានភ្លៀងធ្លាក់ខ្លាំងនៅភាគនិរតីនៃទីក្រុងកំពង់ផែ ប៊ូសាន នៅព្រឹកថ្ងៃអង្គារ បន្ទាប់ពីវាបានផ្លាស់ទីពីកោះ Jeju ក្នុងថ្ងៃនេះ ។
ប្រធានាធិបតីកូរ៉េខាងត្បូង លោក Yun Seok Yeol បាននិយាយថា រដ្ឋាភិបាលកូរ៉េខាងត្បូងកំពុងដំណើរការក្នុងការត្រៀមខ្លួនដើម្បីទប់ទល់នឹងភាពអាសន្នគ្រប់ពេលវេលា លោកបានបញ្ជាឱ្យគ្រប់ភាគីពាក់ព័ន្ធធ្វើការឱ្យបានពេញលេញ ដើម្បីកាត់បន្ថយការខូចខាតនានាដោយសារព្យុះទីហ្វុង Hinnamnor ដ៏ធ្ងន់ធ្ងរមួយនេះ ។
