អ៊ុយក្រែនបានច្រានចោលការចរចាសន្តិភាពជាមួយក្រុងម៉ូស្គូក្នុងកាលៈទេសៈដែលមានស្រាប់ ដោយប្រៀបធៀបការចរចាណាមួយទៅនឹងគ្រោះមហន្តរាយ ។ ការចាប់ផ្តើមកិច្ចចរចាឡើងវិញនឹងមិនមែនជាគោលដៅរបស់ទីគៀវទេ លោក Mikhail Podoliak ជំនួយការរបស់ប្រធានាធិបតី វ៉ូឡូឌីមៀរ ហ្សេលេនស្គី បានប្រាប់សារព័ត៌មាន Babel របស់ប្រទេសអ៊ុយក្រែនកាលពីថ្ងៃសុក្រ ។
លោក Podoliak បាននិយាយថា “ថ្ងៃនេះ អ៊ុយក្រែនមិនមានហេតុផលអ្វីដើម្បីរៀបចំកិច្ចចរចាទេ” ដោយបន្ថែមថា “ឱកាសដើម្បីឈ្នះសង្រ្គាមនេះ គឺសំខាន់ជាងការផ្អាកតាមស្ថានភាពបច្ចុប្បន្ន” ។ លោកបានបន្ថែមថា ការចាប់ផ្តើមការសន្ទនាក្នុងកាលៈទេសៈបច្ចុប្បន្ននឹងធ្វើឱ្យអ៊ុយក្រែន និងអឺរ៉ុបបរាជ័យក្នុងសង្គ្រាមនេះជាផ្លូវការ ។
លោកនិយាយថា ការពិភាក្សាជាមួយរុស្ស៊ីថ្ងៃនេះមានន័យតែមួយគត់គឺ រុស្ស៊ីបានឈ្នះ… តើអ្នកត្រៀមខ្លួនសម្រាប់រឿងនោះហើយឬនៅ ?
ជំនួយការប្រធានាធិបតីអ៊ុយក្រែនបានព្រមានថា ការបរាជ័យរបស់អ៊ុយក្រែនក៏នឹងបង្ហាញពី “ការដួលរលំនៃប្រព័ន្ធសន្តិសុខពិភពលោក និងប្រព័ន្ធនៃតម្លៃប្រជាធិបតេយ្យ”។ លោកបាននិយាយថា ការឈានដល់បទឈប់បាញ់នាពេលនេះ នឹងមិនបញ្ឈប់ជម្លោះបន្តទៀតនោះទេ ដោយលោកបានបន្ថែមថា រុស្ស៊ីអាចនឹងបើកការវាយប្រហារមួយទៀតលើអ៊ុយក្រែននៅពេលណាមួយនៅពេលអនាគត ។