អាជ្ញាធរអវកាសចិនបាននិយាយនៅថ្ងៃព្រហស្បតិ៍នេះថា មិនមានភស្តុតាងណាមួយដែលបញ្ជាក់ថា មនុស្សភពក្រៅមានវត្តមាននៅលើផែនដីទេ ក្នុងការឆ្លើយតបជាផ្លូវការលើកដំបូងរបស់ពួកគេចំពោះសំណួរអំពីទម្រង់ជីវិតក្រៅភព ។
វាជាលើកទីមួយហើយដែលសាជីវកម្មវិទ្យាសាស្ត្រ និងបច្ចេកវិទ្យាអវកាសចិន (CASC) បានឆ្លើយតបទៅនឹងសំណួររបស់សាធារណជនលើប្រធានបទនេះ ហើយបានតាមដានសវនាការនៅឯសមាជសភាម៉ិកស៊ិកកាលពីដើមសប្តាហ៍នេះ ដែលត្រូវបានបង្ហាញសាកសពដែលត្រូវបាន “បញ្ជាក់ថាមិនមែនជាមនុស្សចំនួន២” ។
Jaime Maussan អ្នកកាសែត និងជាអ្នកចូលចិត្ត UFO បានបង្ហាញ “សាកសព” ចំនួនពីរ ដែលគាត់បាននិយាយថា ត្រូវបានគេរកឃើញនៅក្រោមដីនៅឯបុរាណដ្ឋាន Nazca ប្រទេសប៉េរូក្នុងឆ្នាំ ២០១៧ ។ គាត់បានប្រាប់សវនាការសភាលើកដំបូងរបស់ប្រទេសលើ UFOs ថាការវិភាគដោយសាកលវិទ្យាល័យជាតិស្វយ័តម៉ិកស៊ិកបានសន្និដ្ឋានថា សាកសពទាំងនេះមានអាយុកាលប្រហែល ១,០០០ ឆ្នាំ។ ការអះអាងរបស់គាត់ត្រូវបានស្វាគមន៍ជាមួយនឹងការសង្ស័យយ៉ាងខ្លាំងពីសំណាក់អ្នកតាមដានលើពិភពលោក ។
ជាការឆ្លើយតបទៅនឹងសំណួររបស់សាធារណជន គណនីផ្លូវការរបស់សាជីវកម្មវិទ្យាសាស្ត្រ និងបច្ចេកវិទ្យាអវកាសចិន CASC ដែលចែករំលែកខ្លឹមសារអប់រំជាចម្បង បានឆ្លើយតបថា “មកទល់ពេលនេះ នៅក្នុងសកម្មភាពអវកាសរបស់យើង យើងមិនបានរកឃើញភស្តុតាងច្បាស់លាស់ណាមួយអំពីអត្ថិភាពនៃមនុស្សក្រៅភពទេ” ។
អ្នកប្រើប្រាស់ផ្សេងទៀតនៅលើវេទិកាបានសម្តែងការងឿងឆ្ងល់អំពីសាកសពដែលបង្ហាញដល់សមាជិកសភាម៉ិកស៊ិក ដោយនិយាយថា សាកសពទាំងនោះជារបស់ក្លែងក្លាយដែលត្រូវបានរចនាឡើងដើម្បីឱ្យមើលទៅដូចមនុស្សភពក្រៅ ។
South China Morning Post
