ក្រសួងការបរទេសសហរដ្ឋអាម៉េរិកបានអនុម័តការលក់ឧបករណ៍យោធាដែលមានតម្លៃ 1.1 ពាន់លានដុល្លារទៅឱ្យតៃវ៉ាន់ ដែលរួមមានទាំងមីស៊ីលប្រឆាំងនាវាចំនួន 60 ដើម និងមីស៊ីលពីអាកាសទៅអាកាសចំនួន 100 ដើមខណៈប្រទេសចិនបានគំរាមចាត់វិធានការតបតវិញចំពោះការអនុម័តនេះផងដែរ ។ នេះបើយោងតាមការចេញផ្សាយដោយសារព័ត៌មាន Reuters ។
មន្ទីរបញ្ចកោណបានប្រកាសកញ្ចប់អាវុធនេះកាលពីថ្ងៃសុក្រ បន្ទាប់ពីការធ្វើសមយុទ្ធយោធាដ៏ខ្លាំងក្លារបស់ចិននៅជុំវិញកោះតៃវ៉ាន់ បន្ទាប់ពីដំណើរទស្សនកិច្ចទៅកាន់កោះនេះកាលពីខែមុនដោយប្រធានសភាតំណាងសហរដ្ឋអាម៉េរិកលោកស្រី Nancy Pelosi ។
ការលក់នេះរួមមានមីស៊ីល Sidewinder ដែលអាចប្រើសម្រាប់បេសកកម្មវាយប្រហារពីលើអាកាស និងលើដី ក្នុងតម្លៃប្រហែល 85.6 លានដុល្លារ មីស៊ីលប្រឆាំងនាវា Harpoon ក្នុងតម្លៃប៉ាន់ស្មាន 355 លានដុល្លារ និងការគាំទ្រសម្រាប់កម្មវិធីរ៉ាដាឃ្លាំមើលរបស់តៃវ៉ាន់សម្រាប់មួយដែលមានតម្លៃ 665.4 លានដុល្លារ។
លោក Liu Pengyu អ្នកនាំពាក្យស្ថានទូតចិនប្រចាំទីក្រុងវ៉ាស៊ីនតោនបាននិយាយក្នុងសេចក្តីថ្លែងការណ៍មួយថា ការលក់សព្វាវុធដែលអាចធ្វើទៅបាន «ប៉ះពាល់យ៉ាងធ្ងន់ធ្ងរដល់ទំនាក់ទំនងរវាងចិន និងអាម៉េរិក និងសន្តិភាព និងស្ថិរភាពនៅទូទាំងច្រកសមុទ្រតៃវ៉ាន់»។
លោកបាននិយាយថា ប្រទេសចិននឹងចាត់វិធានការប្រឆាំងស្របច្បាប់ និងចាំបាច់ដោយម៉ឺងម៉ាត់ ទាក់ទងនឹងការវិវត្តន៍នៃស្ថានការណ៍នេះ ”។
រដ្ឋបាលរបស់ប្រធានាធិបតី ចូ បៃដិន បាននិយាយថា កញ្ចប់នេះកំពុងស្ថិតក្រោមការពិចារណាមួយរយៈ ហើយត្រូវបានបង្កើតឡើងនៅក្នុងការពិគ្រោះយោបល់ជាមួយសមាជិកសភាតៃវ៉ាន់ និងសហរដ្ឋអាម៉េរិក ។
