ប្រធានាធិបតីអ៊ុយក្រែនលោក វ៉ូឡូឌីមៀរ ហ្សេលេនស្គី បានអំពាវនាវកាលពីថ្ងៃអាទិត្យសម្រាប់ការឆ្លើយតបជាអន្តរជាតិកាន់តែខ្លាំងចំពោះអ្វីដែលលោកបានពិពណ៌នាថាជា “ភេរវកម្មនុយក្លេអ៊ែរ” របស់រុស្ស៊ីបន្ទាប់ពីការបាញ់ផ្លោងនៅរោងចក្រថាមពលនុយក្លេអ៊ែរ Zaporizhzhia ដែលជារោងចក្រធំបំផុតនៅអឺរ៉ុប នេះបើយោងតាមការចេញផ្សាយដោយសារព័ត៌មាន Reuters ។
ក្នុងអំឡុងពេលសន្ទនាតាមទូរស័ព្ទជាមួយប្រធានក្រុមប្រឹក្សាអឺរ៉ុប លោក Charles Michel លោក Zelenskiy បានអំពាវនាវឱ្យមានការដាក់ទណ្ឌកម្មលើឧស្សាហកម្មនុយក្លេអ៊ែរ និងឥន្ធនៈនុយក្លេអ៊ែររបស់រុស្ស៊ី ។
ក្រុមហ៊ុនថាមពលនុយក្លេអ៊ែររដ្ឋរបស់អ៊ុយក្រែនបាននិយាយនៅមុននេះថា កម្មករម្នាក់បានរងរបួសនៅពេលដែលកងកម្លាំងរុស្ស៊ីបានបាញ់ផ្លោងលើរោងចក្រថាមពលនុយក្លេអ៊ែរ Zaporizhzhia កាលពីល្ងាចថ្ងៃសៅរ៍ ។
អ៊ុយក្រែនបាននិយាយកាលពីថ្ងៃអាទិត្យថាការបាញ់ផ្លោងរបស់រុស្ស៊ីជាថ្មីបានធ្វើឱ្យខូចឧបករណ៍ចាប់សញ្ញាវិទ្យុសកម្មចំនួនបី និងធ្វើឱ្យកម្មករម្នាក់នៅរោងចក្រថាមពល Zaporizhzhia រងការវាយប្រហារជាលើកទីពីរក្នុងរយៈពេលប៉ុន្មានថ្ងៃជាប់ៗគ្នាលើរោងចក្រនុយក្លេអ៊ែរដ៏ធំបំផុតរបស់អឺរ៉ុប ។
ប្រធានាធិបតីអ៊ុយក្រែនលោក ហ្សេលេនស្គី បាននិយាយនៅក្នុងសុន្ទរកថាតាមទូរទស្សន៍កាលពីថ្ងៃអាទិត្យថា “មិនមានប្រទេសណាមួយនៅលើពិភពលោកដែលអាចមានអារម្មណ៍ថាមានសុវត្ថិភាពទេ នៅពេលដែលរដ្ឋភេរវករមួយបានធ្វើឲ្យឆេះរោងចក្រនុយក្លេអ៊ែរ” ។
