រុស្ស៊ីបានប្រាប់សហរដ្ឋអាម៉េរិកថា ទំនាក់ទំនងការទូតនឹងត្រូវខូចខាតយ៉ាងធ្ងន់ធ្ងរ ហើយថែមទាំងអាចនឹងត្រូវផ្តាច់ទាំងស្រុង ប្រសិនបើរុស្ស៊ីត្រូវបានប្រកាសថាជា “រដ្ឋគាំទ្រភេរវកម្ម” នេះបើតាម Tass បានដកស្រង់សម្តីមន្ត្រីកំពូលម្នាក់បាននិយាយកាលពីថ្ងៃសុក្រ ហើយត្រូវបានចុះផ្សាយដោយសារព័ត៌មាន Reuters ។
លោក Alexander Darchiyev ប្រធាននាយកដ្ឋានអាម៉េរិកខាងជើងនៅក្រសួងការបរទេសរុស្ស៊ី បាននិយាយថា ប្រសិនបើព្រឹទ្ធសភាអាម៉េរិកបានឆ្លងកាត់ផែនការដើម្បីផ្តាច់ខ្លួនពីប្រទេសរុស្ស៊ី នោះមានន័យថាទីក្រុងវ៉ាស៊ីនតោនបានឆ្លងផុតចំណុចដែលមិនអាចវិលត្រឡប់មកវិញ ។
កាលពីខែមុន សមាជិកព្រឹទ្ធសភាអាម៉េរិកពីររូប ដែលចង់អនុម័តច្បាប់មួយ ដែលកំណត់ប្រទេសរុស្ស៊ី ជារដ្ឋគាំទ្រអំពើភេរវកម្ម បានទៅទស្សនកិច្ចនៅទីក្រុងគៀវ ដើម្បីពិភាក្សាអំពីច្បាប់នេះ ជាមួយប្រធានាធិបតី វ៉ូឡូឌីមៀរ ហ្សេលេនស្គី ។
លោក Darchiyev បាននិយាយថា ប្រសិនបើរឿងនេះកើតឡើងមែននោះ វានឹងបណ្តាលឱ្យមានការខូចខាតយ៉ាងធ្ងន់ធ្ងរបំផុតសម្រាប់ទំនាក់ទំនងការទូតទ្វេភាគីរវាងប្រទេសទាំង២ រហូតដល់កម្រិតនៃការបន្ទាបបន្ថោក ហើយថែមទាំងធ្វើឱ្យពួកគេបែកបាក់គ្នាទៀតផង នេះបើតាម Tass បានដកស្រង់សម្តីរបស់លោក។
សភារបស់ប្រទេសឡាតវីកាលពីថ្ងៃព្រហស្បតិ៍បានកំណត់ប្រទេសរុស្ស៊ីជារដ្ឋគាំទ្រភេរវកម្មលើសង្គ្រាមនៅអ៊ុយក្រែន និងបានអំពាវនាវឱ្យសម្ពន្ធមិត្តលោកខាងលិចដាក់ទណ្ឌកម្មឲ្យកាន់តែខ្លាំងបន្ថែមទៀតលើទីក្រុងម៉ូស្គូ ។
