អ្នកនាំពាក្យវិមានក្រឹមឡាំង លោក Dmitry Peskov បាននិយាយកាលពីថ្ងៃពុធថា អ៊ុយក្រែនអាចបញ្ចប់ជម្លោះដែលកំពុងតែបន្តនេះនៅគ្រប់ពេលវេលា ដោយគ្រាន់តែយល់ព្រមតាមលក្ខខណ្ឌរបស់រុស្ស៊ី នេះបើតាមការចេញផ្សាយដោយសារព័ត៌មាន RT ។
“រុស្ស៊ីបានត្រៀមខ្លួនរួចជាស្រេចសម្រាប់កិច្ចព្រមព្រៀងសន្តិភាពជាមួយភាគីអ៊ុយក្រែន ហើយពួកគេបានដឹងច្បាស់អំពីលក្ខខណ្ឌរបស់យើង ។ មធ្យោបាយមួយ ឬមធ្យោបាយផ្សេងទៀត ពួកគេនឹងសម្រេចបាន” មន្ត្រីរូបនេះបានប្រាប់អ្នកសារព័ត៌មាន។
លោក Peskov បានបន្តពន្យល់ថា កាលពីចុងខែមីនា ប្រទេសទាំងពីរជិតនឹងដោះស្រាយការខ្វែងគំនិតរបស់ពួកគេតាមរបៀបដែលអាចទទួលយកបានសម្រាប់រុស្ស៊ី ប៉ុន្តែសេចក្តីព្រាងកិច្ចព្រមព្រៀងដែលបានរៀបចំក្នុងអំឡុងពេលកិច្ចប្រជុំនៅទីក្រុងអ៊ីស្តង់ប៊ុលត្រូវបានបំផ្លាញដោយភាគីអ៊ុយក្រែន។
ទីក្រុងគៀវ បានផ្តាច់ការចរចាជាមួយក្រុងម៉ូស្គូ បន្ទាប់ពីបានចោទរុស្ស៊ីពីបទឧក្រិដ្ឋកម្មសង្គ្រាម ដែលជាការចោទប្រកាន់ដែលរុស្ស៊ីបាននិយាយថា ផ្អែកលើភស្តុតាងប្រឌិត ។ ចាប់តាំងពីពេលនោះមក ថ្នាក់ដឹកនាំអ៊ុយក្រែនបានទទូចថា ការចរចាអាចចាប់ផ្តើមឡើងវិញបាន លុះត្រាតែរុស្ស៊ីត្រូវបានចាញ់នៅលើសមរភូមិដោយមានជំនួយពីសព្វាវុធរបស់លោកខាងលិច ។
