ក្រសួងការពារជាតិរុស្ស៊ីបាននិយាយថា ចក្រភពអង់គ្លេសបានស្នើសុំការអនុញ្ញាតឱ្យយន្តហោះចារកម្ម RC-135 មួយគ្រឿងរបស់ខ្លួនហោះហើរពីលើប្រទេសរុស្ស៊ី ដែលជាទង្វើមួយដែលរុស្ស៊ីហៅថា ជាការបង្កហេតុដោយចេតនា ។
ក្រសួងការពារជាតិរុស្ស៊ីបាននិយាយកាលពីថ្ងៃអង្គារថា ទីក្រុងឡុងដ៍បានផ្ញើសេចក្តីជូនដំណឹងមួយអំពីផែនការហោះហើរនៃយន្តហោះឈ្លបយកការណ៍ RC-135 តាមបណ្តោយផ្លូវដែលឆ្លងកាត់មួយផ្នែកលើទឹកដីរុស្ស៊ី នេះបើតាមយោងតាមការចុះផ្សាយដោយសារព័ត៌មាន Al Jazeera ។
ប្រភពក្រសួងការពារជាតិរបស់ចក្រភពអង់គ្លេស ដែលដកស្រង់ដោយទីភ្នាក់ងារសារព័ត៌មាន Reuters បានបដិសេធថា ចក្រភពអង់គ្លេសមិនបានសុំការអនុញ្ញាតឱ្យហោះហើរយន្តហោះចារកម្មលើប្រទេសរុស្ស៊ីនោះទេ ។
ក្រសួងការពារជាតិរុស្ស៊ីបាននិយាយថា កម្លាំងទ័ពអាកាសរបស់រុស្ស៊ីមានភារកិច្ចទប់ស្កាត់រាល់ការរំលោភលើដែនអាកាសរុស្ស៊ី ។
ក្រសួងការពារជាតិរុស្ស៊ីបាននិយាយថា កងទ័ពអាកាសរុស្ស៊ីត្រូវបានចេញបញ្ជា ដើម្បីត្រៀមការពារការឈ្លានពាន ។