ប្រធានាធិបតីអ៊ុយក្រែនលោក វ៉ូឡូឌីមៀរ ហ្សេលេនស្គី មិនមានរបួសធ្ងន់ធ្ងរ បន្ទាប់ពីលោកបានជួបគ្រោះថ្នាក់ចរាចរណ៍នៅទីក្រុងគៀវ កាលពីថ្ងៃពុធ ។ នេះបើយោងតាមការចេញផ្សាយដោយសារព័ត៌មាន CNN ។
យោងតាមសេចក្តីថ្លែងការណ៍របស់លេខាធិការសារព័ត៌មានរបស់ប្រធានាធិបតី “រថយន្តមួយបានបុកជាមួយរថយន្តរបស់ប្រធានាធិបតីអ៊ុយក្រែន និងរថយន្តអមដំណើរ” ។
គ្រូពេទ្យដែលអមដំណើរលោក ហ្សេលេនស្គី បានផ្តល់ជំនួយសង្គ្រោះបន្ទាន់ដល់អ្នកបើកបររថយន្ត ហើយបានបញ្ជូនគាត់ទៅកាន់រថយន្តសង្គ្រោះ ។
សេចក្តីថ្លែងការណ៍បានបន្ថែមថា “ប្រធានាធិបតីត្រូវបានពិនិត្យដោយវេជ្ជបណ្ឌិត មិនឃើញមានរបួសធ្ងន់ធ្ងរទេ”។
អាជ្ញាធរកំពុងស៊ើបអង្កេតពីស្ថានភាពនៃឧបទ្ទវហេតុនេះ ។
កាលពីព្រឹកថ្ងៃពុធ លោក ហ្សេលេនស្គី បានទៅទស្សនាតំបន់ Izium ដែលទើបបានរំដោះនៅក្នុងតំបន់ភាគឦសាននៃទីក្រុង Kharkiv ប្រាំថ្ងៃបន្ទាប់ពីកងកម្លាំងរបស់ប្រទេសបានដណ្តើមយកទីក្រុងនេះមកវិញ ។