ប្រធានាធិបតីអាមេរិក ចូ បៃដិន បានប្រកាសកញ្ចប់ជំនួយសព្វាវុធថ្មីតម្លៃ ៦០០ លានដុល្លារ ដើម្បីជួយយោធាអ៊ុយក្រែនប្រយុទ្ធជាមួយរុស្ស៊ី នេះបើតាមអនុស្សរណៈរបស់សេតវិមានដែលបានផ្ញើទៅក្រសួងការបរទេសកាលពីថ្ងៃព្រហស្បតិ៍ ចេញផ្សាយដោយសារព័ត៌មាន Reuters ។
មន្ទីរបញ្ចកោណបាននិយាយថា កញ្ចប់ជំនួយថ្មីនេះរួមមានប្រព័ន្ធបាញ់មីស៊ីល High Mobility Artillery Rocket Systems (HIMARS) វ៉ែនតាពេលយប់ គ្រាប់មីន claymore ឧបករណ៍បោសសម្អាតមីន គ្រាប់កាំភ្លើងធំ 105mm និងគ្រាប់កាំភ្លើងធំ 155mm ។
អនុស្សរណៈរបស់សេតវិមានក៏បានលើកឡើងផងដែរថា ប្រាក់នេះនឹងត្រូវប្រើប្រាស់សម្រាប់ការអប់រំ និងការបណ្តុះបណ្តាលយោធាអ៊ុយក្រែន ។
ទីក្រុងវ៉ាស៊ីនតោនបានបញ្ជូនជំនួយផ្នែកសន្តិសុខប្រហែល 15.1 ពាន់លានដុល្លារដល់រដ្ឋាភិបាលទីក្រុងគៀវ ចាប់តាំងពីការឈ្លានពានរបស់រុស្ស៊ី។
មន្ទីរបញ្ចកោណបាននិយាយថា “ដើម្បីបំពេញតាមតម្រូវការនៃសមរភូមិដែលកំពុងវិវត្តរបស់អ៊ុយក្រែន សហរដ្ឋអាម៉េរិកនឹងបន្តធ្វើការជាមួយសម្ពន្ធមិត្ត និងដៃគូរបស់ខ្លួន ដើម្បីផ្តល់ឱ្យអ៊ុយក្រែននូវអាវុធសំខាន់ៗ” ។