ប្រធានសភាអាម៉េរិកលោកស្រី Nancy Pelosi បានទៅដល់ប្រទេសអាមេនី ជាកន្លែងដែលបទឈប់បាញ់មួយបានកើតឡើង បន្ទាប់ពីការផ្ទុះការប្រយុទ្ធគ្នារវាងប្រទេសអាមេនី និងអាស៊ែបៃហ្សង់ដែលបានសម្លាប់ទាហានរាប់រយនាក់ពីភាគីទាំងពីរ ។
លោកស្រី Pelosi បានមកដល់រដ្ឋធានី Yerevan ប្រទេសអាមេនី កាលពីថ្ងៃសៅរ៍ ។
លោកស្រី គឺជាមន្ត្រីជាន់ខ្ពស់របស់សហរដ្ឋអាម៉េរិកដែលធ្វើដំណើរទស្សនកិច្ចផ្លូវការទៅកាន់ប្រទេសអាមេនីចាប់តាំងពីប្រទេសក្រីក្រមួយនេះទទួលបានឯករាជ្យពីសហភាពសូវៀតក្នុងឆ្នាំ 1991។
ស្ថានទូតសហរដ្ឋអាម៉េរិកបាននិយាយថា ដំណើរទស្សនកិច្ចរបស់លោកស្រី Pelosi នឹងរួមបញ្ចូលកិច្ចប្រជុំជាមួយនាយករដ្ឋមន្ត្រីអាមេនី Nikol Pashinyan ។ កាលពីថ្ងៃសុក្រ លោកស្រី Pelosi បានប្រាប់អ្នកយកព័ត៌មាននៅទីក្រុងប៊ែរឡាំងថា ដំណើរទស្សនកិច្ចនេះគឺនិយាយអំពីសិទ្ធិមនុស្ស និងគោរពសេចក្តីថ្លៃថ្នូរ និងតម្លៃរបស់មនុស្សគ្រប់រូប ។
សមាជិកសភាអាម៉េរិកផ្សេងទៀតដែលអមដំណើរលោកស្រី Pelosi រួមមានលោក Frank Pallone ប្រធានគណៈកម្មាធិការថាមពល និងពាណិជ្ជកម្មសភា និងសមាជិកសភា Jackie Speier និង Anna Eshoo ។
ប្រធានសភានៃប្រទេសអាមេនី លោក Alen Simonyan បានប្រាប់អ្នកសារព័ត៌មានថា ដំណើរទស្សនកិច្ចរយៈពេលបីថ្ងៃរបស់លោកស្រី Pelosi នឹង “ដើរតួនាទីយ៉ាងសំខាន់ក្នុងការធានាសន្តិសុខរបស់យើង” ។
អាមេនី និងអាស៊ែបៃហ្សង់បានប្រយុទ្ធគ្នាក្នុងសង្រ្គាមចំនួន២ក្នុងឆ្នាំ 2020 និងក្នុងទសវត្សរ៍ឆ្នាំ 1990 លើតំបន់ Nagorno-Karabakh ដែលជាតំបន់ដែលមានប្រជាជនអាមេនីរស់នៅ ខណៈតំបន់នោះជារបស់ប្រទេសអាហ្សែបៃហ្សង់ ។
សង្រ្គាមឆ្នាំ 2020 បានសម្លាប់ទាហានជាង 6,500 នាក់ពីភាគីទាំងពីរ ហើយបានបញ្ចប់ដោយបទឈប់បាញ់ដែលសម្របសម្រួលដោយរុស្ស៊ី ។ នៅក្រោមកិច្ចព្រមព្រៀងនោះ អាមេនីបានប្រគល់ទឹកដីដែលខ្លួនគ្រប់គ្រងអស់ជាច្រើនទសវត្សរ៍មកហើយ ហើយទីក្រុងម៉ូស្គូបានដាក់ពង្រាយកងរក្សាសន្តិភាពរុស្ស៊ីប្រហែល 2,000 នាក់ ដើម្បីត្រួតពិនិត្យបទឈប់បាញ់ដ៏ផុយស្រួយ ។
រុស្ស៊ីជាសម្ព័ន្ធមិត្តយោធារបស់អាមេនី ហើយក៏ខិតខំធ្វើទំនាក់ទំនងមិត្តភាពជាមួយអាស៊ែបៃហ្សង់ ។