ប្រទេសឥណ្ឌាបានដាក់បង្ហាញនាវាផ្ទុកយន្តហោះរបស់ខ្លួនដែលត្រូវបានផលិតក្នុងប្រទេសលើកដំបូង ក្នុងពិធីមួយនៅរដ្ឋ Kerala ភាគខាងត្បូងនៃប្រទេស ។ នេះបើយោងតាមការចេញផ្សាយដោយសារព័ត៌មាន BBC ។
នាវាផ្ទុកយន្តហោះនេះមានឈ្មោះថា INS Vikrant មានប្រវែង 262m (860ft) និងកម្ពស់ជិត 60m (197ft) ទម្ងន់ 45,000 តោន គឺជានាវាផ្ទុកយន្តហោះដំបូងបង្អស់ដែលឥណ្ឌាបានរចនា និងសាងសង់ដោយខ្លួនឯង ។ វាមានសមត្ថភាពផ្ទុកយន្តហោះចម្បាំង និងឧទ្ធម្ភាគចក្រចំនួន 30 គ្រឿង។
នាវាផ្ទុកយន្តហោះ INS Vikrant ដែលមានតម្លៃប្រហែល 2.5 ពាន់លានដុល្លារ ត្រូវបានគេរំពឹងថានឹងត្រូវបានបញ្ចូលទៅក្នុងកងទ័ពជើងទឹកនៅឆ្នាំ 2017 ។ ប៉ុន្តែដំណាក់កាលទីពីរនៃការសាងសង់របស់វាត្រូវបានពន្យារពេល ។
បន្ទាប់ពីការដាក់ឱ្យដំណើរការកាលពីថ្ងៃសុក្រ នាវា Vikrant នេះនឹងធ្វើដំណើរឆ្លងកាត់ដែនទឹកឥណ្ឌា និងអន្តរជាតិ អមដោយកងនាវាចម្បាំង នាវាពិឃាត និងនាវាមុជទឹកដើម្បីការពារ ។
