កាលពីថ្ងៃទី១១ ខែធ្នូ នាយករដ្ឋមន្ត្រីកម្ពុជា លោក ហ៊ុន ម៉ាណែត បានជួបជាមួយសមភាគីវៀតណាម លោក Pham Minh Chinh ក្នុងដំណើរបំពេញទស្សនកិច្ចផ្លូវការនៅរដ្ឋធានីហាណូយ ប្រទេសវៀតណាម ។ ក្នុងដំណើរទស្សនកិច្ចរយៈពេលពីរថ្ងៃ ភាគីទាំងពីរបានពិភាក្សាលើបញ្ហាជាច្រើនដូចជាវិស័យការពារជាតិ កិច្ចការព្រំដែន ពាណិជ្ជកម្ម និងអប់រំ ។ ពួកគេក៏បានចុះហត្ថលេខាលើកិច្ចព្រមព្រៀងសហប្រតិបត្តិការក្នុងវិស័យវិទ្យាសាស្ត្រ និងពាណិជ្ជកម្មផងដែរ ។
ក្នុងអំឡុងពេលជួបពិភាក្សាជាមួយលោក ហ៊ុន ម៉ាណែត លោក Pham Minh Chinh បានសម្តែងការព្រួយបារម្ភចំពោះគម្រោងព្រែកជីកហ្វូណនតេជោរបស់កម្ពុជា ។ នាយករដ្ឋមន្រ្តីវៀតណាមរូបនេះបង្ហាញការព្រួយបារម្ភថា គម្រោងនេះនឹងជះឥទ្ធិពលអវិជ្ជមានដល់បរិស្ថាន និងប្រព័ន្ធទឹកនៃទន្លេមេគង្គ ជាពិសេសទឹកទន្លេខាងក្រោមដែលហូរពីកម្ពុជាទៅវៀតណាម។ ជាការឆ្លើយតប លោក ហ៊ុន ម៉ាណែត បានបញ្ជាក់ជាថ្មីថា ការសិក្សាបឋមលើគម្រោងនេះ បង្ហាញថា ផលប៉ះពាល់បរិស្ថានលើប្រទេសវៀតណាមនឹងមានតិចតួចបំផុត ។
គម្រោងព្រែកជីកហ្វូណនតេជោ ដែលត្រូវប៉ាន់ប្រមាណថានឹងចំណាយថវិកាប្រមាណ ១,៧ ពាន់លានដុល្លារ ជាព្រែកជីកមួយដែលនឹងតភ្ជាប់កំពង់ផែសមុទ្ររបស់កម្ពុជានៅភាគនិរតីទៅទន្លេមេគង្គ ។ មានប្រវែង ១៨០ គីឡូម៉ែត្រព្រែកជីកហ្វូណនតេជោនឹងតភ្ជាប់ខេត្តជាប់មាត់សមុទ្ររបស់ទៅទន្លេមេគង្គ ។ នេះនឹងបង្កើតជាផ្លូវទឹកតភ្ជាប់ពីរាជធានីភ្នំពេញទៅកាន់ឆ្នេរសមុទ្រ និងសំខាន់ជាងនេះទៅទៀតគឺកំពង់ផែសមុទ្រទឹកជ្រៅតែមួយគត់របស់ប្រទេសនេះនៅខេត្តព្រះសីហនុ ។
ការសិក្សាលទ្ធភាពសម្រាប់គម្រោងនេះត្រូវបានបញ្ចប់ហើយ ហើយរដ្ឋាភិបាលកម្ពុជាបានប៉ាន់ប្រមាណថានឹងត្រូវចំណាយពេល ៤ ឆ្នាំដើម្បីបញ្ចប់គម្រោងសាងសង់ ។ ប្រសិនបើជោគជ័យ វានឹងកាត់បន្ថយថ្លៃដើមដឹកជញ្ជូនទំនិញពីកំពង់ផែទឹកជ្រៅទៅកាន់ទីក្រុងភ្នំពេញ ។
ការព្រួយបារម្ភរបស់វៀតណាមត្រូវបានមើលឃើញដោយអ្នកអត្ថាធិប្បាយ និងឥស្សរជននយោបាយកម្ពុជាជាច្រើនថា វៀតណាមព្រួយបារម្ភលើបញ្ហានយោបាយ-សេដ្ឋកិច្ចជាជាងបរិស្ថាន។ វៀតណាមមិនសប្បាយចិត្តនឹងកម្ពុជាទាក់ទងនឹងគម្រោងនេះ។
ការព្រួយបារម្ភរបស់វៀតណាមចំពោះគម្រោងព្រែកជីកហ្វូណនតេជោរបស់កម្ពុជា ភាគច្រើនគឺមានលក្ខណៈសេដ្ឋកិច្ចដោយសារព្រែកជីកហ្វូណនតេជោ នឹងកាត់បន្ថយការពឹងពាក់របស់កម្ពុជាលើវៀតណាមសម្រាប់ការដឹកជញ្ជូនតាមផ្លូវទឹក ។ ក្នុងឆ្នាំ ២០១៦ ទីភ្នាក់ងារសហប្រតិបត្តិការអន្តរជាតិជប៉ុនបានចេញផ្សាយរបាយការណ៍មួយដែលបង្ហាញថាទី ក្រុងភ្នំពេញពឹងផ្អែកលើកំពង់ផែរបស់វៀតណាមសម្រាប់ការដឹកជញ្ជូនការនាំចេញសម្លៀកបំពាក់ និងការនាំចូលវត្ថុធាតុដើម ។
ទីក្រុងភ្នំពេញមានផ្លូវទឹកតភ្ជាប់ទៅកាន់កំពង់ផែរបស់វៀតណាមតាមរយៈទន្លេមេគង្គ ។ ដូច្នេះ ការនាំចេញសម្លៀកបំពាក់ជាធម្មតាត្រូវបានដឹកជញ្ជូនតាមកប៉ាល់ពីកំពង់ផែស្វយ័តភ្នំពេញទៅកាន់កំពង់ផែទីក្រុងហូជីមិញ ។
ព្រែកជីកហ្វូណនតេជោនឹងផ្ដល់នូវការតភ្ជាប់ដែលមិនធ្លាប់មានពីមុនមករវាងរាជធានីភ្នំពេញ និងកំពង់ផែស្វយ័តក្រុងព្រះសីហនុ ។ នេះនឹងអនុញ្ញាតឱ្យមានការដឹកជញ្ជូនទំនិញងាយស្រួលរវាងកំពង់ផែទាំងពីរនៅភ្នំពេញ និងខេត្តព្រះសីហនុ និងកាត់បន្ថយការពឹងផ្អែករបស់កម្ពុជាលើកំពង់ផែវៀតណាម ។ នៅក្នុងអ្វីដែលលោកនាយករដ្ឋមន្ត្រី ហ៊ុន ម៉ាណែត ហៅថា «ដកដង្ហើមតាមច្រមុះខ្លួនឯង»។
នៅពេលដែលព្រែកជីកហ្វូណនតេជោត្រូវបានបញ្ចប់ការសាងសង់ វៀតណាមពិតជានឹងបាត់បង់ផលប្រយោជន៍សេដ្ឋកិច្ច និងឥទ្ធិពលរបស់ខ្លួនលើកម្ពុជា ហើយនេះបង្ហាញយ៉ាងច្បាស់ ហេតុអ្វីនាយករដ្ឋមន្ត្រីវៀតណាមបញ្ចេញកង្វល់របស់ខ្លួនលើគម្រោងនេះ ។
The Diplomat