តៃវ៉ាន់បាននិយាយកាលពីថ្ងៃពុធថា ខ្លួននឹងអនុវត្តសិទ្ធិរបស់ខ្លួនក្នុងការការពារខ្លួន និងធ្វើការវាយប្រហារតបត ប្រសិនបើកងកម្លាំងប្រដាប់អាវុធចិនចូលទៅក្នុងទឹកដីរបស់ខ្លួន ខណៈដែលទីក្រុងប៉េកាំងបានបង្កើនសកម្មភាពយោធានៅជិតកោះនេះ ។ នេះបើយោងតាមការចេញផ្សាយដោយសារព័ត៌មាន Reuters ។
លោក Lin Wen-Huang អនុប្រធានអគ្គសេនាធិការរងទទួលបន្ទុកប្រតិបត្តិការ និងរៀបចំផែនការ និយាយថា សម្រាប់យន្តហោះ និងកប៉ាល់ដែលបានចូលដែនសមុទ្រ និងដែនអាកាសរបស់យើងដែលមានចម្ងាយ 12 ម៉ាយក្នុងសមុទ្រ កងទ័ពជាតិនឹងអនុវត្តសិទ្ធិការពារខ្លួន និងធ្វើការវាយប្រហារតបតដោយគ្មានករណីលើកលែង ។
តៃវ៉ាន់ក្នុងខែនេះ បានស្នើឱ្យមានការកើនឡើងខ្ទង់ចំណាយនៅលើវិស័យការពារជាតិ ដែលរួមបញ្ចូលទាំងមូលនិធិសម្រាប់ទិញយន្តហោះចម្បាំងថ្មី ប៉ុន្មានសប្តាហ៍បន្ទាប់ពីសមយុទ្ធរបស់ចិន ដែលរួមមានការបាញ់មីស៊ីលរំលងលើរដ្ឋធានីតៃប៉ិរបស់ខ្លួន ។