ប្រទេសជប៉ុនបានគំរាមនឹងប្ដឹងប្រទេសចិនទៅកាន់អង្គការពាណិជ្ជកម្មពិភពលោក WTO ដើម្បីស្វែងរកការលុបចោលការហាមឃាត់របស់ទីក្រុងប៉េកាំងលើការនាំចូលអាហារសមុទ្រទាំងអស់របស់ខ្លួនបន្ទាប់ពីការបញ្ចេញទឹកវិទ្យុសកម្មដែលត្រូវបានបន្សុតរួចចេញពីរោងចក្រថាមពលនុយក្លេអ៊ែរ Fukushima Daiichi ។
រដ្ឋមន្ត្រីការបរទេសជប៉ុន លោក Yoshimasa Hayashi បានប្រាប់អ្នកសារព័ត៌មានថា ប្រទេសជប៉ុននឹងចាត់វិធានការចាំបាច់ (លើការហាមឃាត់ផលិតផលគ្រឿងសមុទ្ររបស់ប្រទេសចិន) ក្រោមផ្លូវផ្សេងៗ រួមទាំងក្របខ័ណ្ឌ WTO ។ រដ្ឋមន្ត្រីសន្តិសុខសេដ្ឋកិច្ចជប៉ុន លោក Sanae Takaichi បាននិយាយដោយឡែកថា ការដាក់ពាក្យប្តឹងទៅកាន់ WTO អាចនឹងក្លាយទៅជាជម្រើសមួយ ប្រសិនបើការតវ៉ាទៅកាន់ប្រទេសចិន តាមរយៈផ្លូវការទូតគឺមិនមានប្រសិទ្ធភាព ។
ការអត្ថាធិប្បាយនេះបានកើតឡើងនៅពេលដែលអាជីវកម្មជប៉ុន និងកន្លែងសាធារណៈបានបន្តទទួលការហៅរំខានពីលេខទូរស័ព្ទដែលមានលេខកូដ +86 របស់ចិន ដោយមានអ្នកហៅទូរស័ព្ទរាយការណ៍ជាច្រើនបានត្អូញត្អែរអំពីការបង្ហូរទឹកនៅហ្វូគូស៊ីម៉ា។
ព័ត៌មាន Jiji បានរាយការណ៍ថា ទីភ្នាក់ងារគោលនយោបាយជាតិរបស់ប្រទេសជប៉ុនបានទទួលរបាយការណ៍ចំនួន ២២៥ នៃការហៅទូរស័ព្ទមកយាយីរហូតមកដល់បច្ចុប្បន្ន ហើយរដ្ឋាភិបាលបាននិយាយថា ខ្លួនកំពុងស្វែងរកជំនួយពីក្រុមហ៊ុនទូរគមនាគមន៍ដើម្បីទប់ស្កាត់ការហៅទូរស័ព្ទនេះ ។
Reuters
