ក្រុមហ៊ុនថាមពលយក្សរបស់រុស្ស៊ី Gazprom និយាយថា ខ្លួនបានចុះហត្ថលេខាលើកិច្ចព្រមព្រៀងជាមួយប្រទេសចិន ដើម្បីចាប់ផ្តើមការបង់ប្រាក់សម្រាប់ការផ្គត់ផ្គង់ឧស្ម័នដល់ប្រទេសចិនជាប្រាក់យន់ និងប្រាក់រូបល ជំនួសឱ្យប្រាក់ដុល្លារអាម៉េរិក ដែលជាសញ្ញានៃទំនាក់ទំនងកាន់តែក្តៅគគុករវាងទីក្រុងប៉េកាំង និងទីក្រុងម៉ូស្គូ ដែលស្ថិតនៅក្រោមការដាក់ទណ្ឌកម្មរបស់លោកខាងលិច នេះបើយោងតាមការចេញផ្សាយដោយសារព័ត៌មាន Al Jazeera ។
លោក Alexei Miller នាយកប្រតិបត្តិក្រុមហ៊ុន Gazprom ត្រូវបានដកស្រង់សម្តីដោយបាននិយាយនៅក្នុងសេចក្តីថ្លែងការណ៍មួយបន្ទាប់ពីកិច្ចប្រជុំតាមវីដេអូជាមួយប្រធានក្រុមប្រេងរបស់ប្រទេសចិន CNPC លោក Dai Houliang ថា “យន្តការទូទាត់ថ្មីគឺជាដំណោះស្រាយដែលផ្តល់ផលប្រយោជន៍ទៅវិញទៅមក ទាន់ពេលវេលា គួរឱ្យទុកចិត្ត និងជាក់ស្តែង” ។
សេចក្តីថ្លែងការណ៍របស់ Gazprom បាននិយាយថា Miller បានជូនដំណឹងដល់សមភាគីចិនអំពី “ស្ថានភាពការងារលើគម្រោងផ្គត់ផ្គង់ឧស្ម័នតាមរយៈបំពង់បង្ហូរឧស្ម័ននៅស៊ីបេរី ដែលតភ្ជាប់បណ្តាញឧស្ម័នរុស្ស៊ី និងចិន ។
ក្រុមហ៊ុន Gazprom មិនបានផ្តល់ព័ត៌មានលម្អិតបន្ថែមអំពីគ្រោងការណ៍នេះ ឬបាននិយាយថានៅពេលណាដែលការទូទាត់នឹងប្តូរពីប្រាក់ដុល្លារទៅជាប្រាក់រូបល និងប្រាក់យន់ទេ ។
ការផ្លាស់ប្តូរនេះគឺជាផ្នែកមួយនៃការជំរុញដើម្បីកាត់បន្ថយការពឹងផ្អែករបស់រុស្ស៊ីលើប្រាក់ដុល្លារអាម៉េរិក ប្រាក់អឺរ៉ូ និងរូបិយប័ណ្ណរឹងផ្សេងទៀតដែលត្រូវបានពន្លឿនដោយទណ្ឌកម្មរបស់លោកខាងលិចក្នុងការឆ្លើយតបទៅនឹងសង្គ្រាមនៅអ៊ុយក្រែន ។
ថ្មីៗនេះ រុស្ស៊ីបាននិងកំពុងធ្វើការលើការកសាងទំនាក់ទំនងសេដ្ឋកិច្ចកាន់តែជិតស្និទ្ធជាមួយប្រទេសចិន និងបណ្តាប្រទេសមិនមែនលោកខាងលិចផ្សេងទៀត ។
ប្រធានាធិបតីរុស្ស៊ី លោក វ្ល៉ាឌីមៀ ពូទីន កាលពីដើមឆ្នាំនេះ បានបង្ខំឱ្យអតិថិជនអឺរ៉ុបបើកគណនីធនាគារប្រាក់រូបលជាមួយ Gazprombank ហើយបង់ប្រាក់ជារូបិយប័ណ្ណរុស្ស៊ី ប្រសិនបើពួកគេចង់បន្តទទួលបានឧស្ម័នរុស្ស៊ី ។ ការផ្គត់ផ្គង់ត្រូវបានកាត់ផ្តាច់ដល់ក្រុមហ៊ុន និងប្រទេសមួយចំនួនដែលបដិសេធលក្ខខណ្ឌនៃកិច្ចព្រមព្រៀង ដែលបណ្តាលឱ្យតម្លៃថាមពលកើនឡើង ។
វិមានក្រឹមឡាំងបាននិយាយថាការផ្គត់ផ្គង់ឧស្ម័នរបស់រុស្ស៊ីទៅកាន់អឺរ៉ុបនឹងមិនបន្តឡើងវិញទេរហូតដល់ទណ្ឌកម្មរបស់លោកខាងលិចប្រឆាំងនឹងទីក្រុងម៉ូស្គូត្រូវបានដកចេញ ។
