ប្រភពការិយាល័យបរទេសមួយបាននិយាយកាលពីថ្ងៃពុធថា ប្រទេសអង់គ្លេសកំពុងអញ្ជើញអ្នកតំណាងមកពីប្រទេសកូរ៉េខាងជើង ដើម្បីចូលរួមពិធីបុណ្យសពរបស់ម្ចាស់ក្សត្រី Elizabeth នៅថ្ងៃចន្ទ ប៉ុន្តែប្រទេសអាហ្វហ្គានីស្ថាន ស៊ីរី និងវេណេហ្ស៊ុយអេឡា នឹងមិនត្រូវបានផ្តល់ការអញ្ជើញនោះទេ ។ នេះបើយោងតាមការចេញផ្សាយដោយសារព័ត៌មាន Reuters ។
ពិធីបុណ្យសពរបស់ម្ចាស់ក្សត្រី Elizabeth នឹងប្រព្រឹត្តទៅនៅទីក្រុងឡុងដ៍នៅថ្ងៃទី 19 ខែកញ្ញា ហើយមានមេដឹកនាំពិភពលោក រាជវង្ស និងឥស្សរជនផ្សេងទៀតបាននិយាយរួចហើយថាពួកគេនឹងចូលរួម ។
ប្រភពបន្តថា ការអញ្ជើញកូរ៉េខាងជើងកុម្មុយនិស្តនឹងធ្វើឡើងក្នុងកម្រិតឯកអគ្គរដ្ឋទូត ។ នេះមានន័យថា មេដឹកនាំកូរ៉េខាងជើង លោក គីម ជុងអ៊ុន នឹងមិនចូលរួមនោះទេ ។ ទីក្រុងព្យុងយ៉ាងមានស្ថានទូតមួយនៅក្រុងឡុងដ៍ភាគខាងលិច ។
ប្រទេសស៊ីរី និងវេណេហ្ស៊ុយអេឡា នឹងមិនត្រូវបានគេអញ្ជើញទេ ព្រោះបច្ចុប្បន្ន អង់គ្លេសមិនមានទំនាក់ទំនងការទូតជាមួយរដ្ឋទាំងនោះទេ។ ប្រភពដដែលបានបន្តថា អាហ្វហ្គានីស្ថានមិនត្រូវបានអញ្ជើញទេ ដោយសារស្ថានការណ៍នយោបាយបច្ចុប្បន្ន ។ ខណៈមីយ៉ាន់ម៉ា រុស្ស៊ី និងបេឡារុស្សក៏មិនត្រូវទទួលបានការអញ្ជើញផងដែរ ។